03
Apr-2018

اشرب مجاناً وانت مسافر اي مكان

أغلب بلاد اوروبا ممكن تشرب مية من حنفيتها من كتر نضافتها وحلاوتها، لكن في بلاد تانية اسيوية وافريقية لازم تشتري مية معدنية علشان تشرب. بالرغم من ان المية من ارخص الحاجات الي ممكن تشتريها في اي بلد، لكن كل ما مدة سفريتك بتزيد، اكيد تكلفتها بتجمع معاك في الآخر.

المرة دي هقولكم على حاجة انا جربتها الخمس شهور الي فاتوا في جنوب شرق اسيا، وخلتني ما اشتريش مية معدنية من اي مكان على الاطلاق. والاهم من كدة كمان انك تقدر تشرب في اي وقت واي مكان – حتى لو قلب الاحراش والغابات. شركة فرنساوي اسمها Water-to-G0  اخترعت زجاجة مية بفلتر صغير متركب فيها (ممكن تغيره كل فترة)، تقدر تنقي المية بدرجة ٩٩٪ من اي شوائب او تلوث (ما عدا مياة البحر المالحة بالتأكيد). بتستخدم تقنيات النانو تكنولوجي ومختلفة تماما عن فلاتر المية الي بتستخدم الكربون.

>>>> عرفوني في الكومنتات لو حد واجه مشاكل في شرب المية وهو مسافر اي بلاد اسيوية افريقية

 مجانا ازاي بقى؟

الزجاجة الصغيرة (سعتها نص لتر) سعرها ٥ جنية استرليني (١٢٤ جنية مصري) والفلتر بتاعها ب ٨ جنية استرليني فقط (١٩٨ جنية مصري) والفلتر الواحد يكفي للشرب ١٣٠ لتر او تقريبا شهرين لو بتشرب ٢ لتر مية في اليوم. يعني لو حسبت تكلفة الفلتر لكل المية الي ممكن تشربها بيه، هتلاقي ان سعر اللتر تقريبا جنية ونص فقط. لكن وانت مسافر هتشرب مية ببلاش …. قصدي هتوفر عليك فلوس كتير وانت مسافر، هو في حاجة بلاش اليومين دول 

ارخص من سعر المية في مصر

لو جيت حسبتها واستخدمتها في مصر هنا من غير ما تسافر، هتلاقي ان تكلفة لتر المية في زجاجة المية المعدنية تقريبا ٣ جنية (لو الازازة الصغيرة ال ٦٠٠ مل سعرها ٢ جنية، يبقى اللتر سعره ٣ جنية). لكن لو عندك فلتر مية في البيت بقى، اكيد هيكون اوفر من هذه الزجاجة.

 نجيبها ليه طيب؟

اولا علشان وانت مسافر، خصوصا اسيا وافريقيا وامريكا اللاتينية، وجود زجاجة مية بفلتر معاك زي دي هتوفر عليك فلوس كتير وانت مسافر، ثانيا والاهم تضمن نقاء ونضافة المية الي بتشربها. انا شخصيا جربتها ٥ شهور في شرق اسيا ولسه معايا في جميع سفرياتي.

فوائد بيئية اخرى

غير الفوائد المادية والصحية الي هتعود عليك من استخدام الزجاجة دي، لو انت مهتم بكوكب الارض المعذب معانا من الاحتباس الحراري والتلوث ونفسك تشارك في الحد من استخدام البلاستك، فالزجاجة دي هتخلينا نوفر اطنان واطنان من البلاستك المستخدم في زجاجات المية المعدنية وتخليك تساعد كوكب الارض انه يستحملنا فترة اطول وتحد من التلوث فيه. كلام لا يهم الكثيرين للأسف، ولكن مهم ولا يجب الاستهتار بيه. في اعتقادي انه يندرج تحت بند الحديث الشريف “إماطة الاذى عن الطريق صدقة” – لانك لما بتعمل اي حاجة تساعد البيئة انها تظل نظيفة وغير ملوثة، هيكون بمثابة اماطة الاذى، المتمثل في الدخان والعوادم عن رئات الناس (جمع رئة).

 نشتريها منين؟

تقدروا تشتروها من موقع الشركة Water-to-Go وتستخدموا الكود ده BADAWY15 عند الدفع علشان تاخدوا خصم 15% عند الشراء.

فرصة بيزنس كويسة

الشركة مرخصة في اوروبا وللاسف منتجاتها بتتباع في اوروبا فقط حاليا من خلال الموقع بتاعهم (اول كومنت). هم حاليا عايزين وكلاء في مصر لو حد مهتم يتواصل معاهم يا ريت وينزلها في مواقع تسوق مصرية.

 صدقة جارية في رمضان الجاي

الزجاجة دي حقيقي ممكن تكون صدقة جارية عظيمة الاجر للاطفال العايشة في مناطق نائية و المية بتاعتها ملوثة وغير صالحة للشرب. اعرف مسافرين متطوعين كتير عملوا حملات تبرعات وجمعوا فلوس واشتروا زجاجات مياة زي دي ووزعوها على القرى الفقيرة النائية في افريقيا. لو حد مهتم نعمل كدة سوا قبل رمضان عرفوني في الكومنتات ونعمل سوا حملة تبرعات نشتري منها كميات نوزعها على الاطفال في القرى الي عندها مشاكل في مية الشرب النظيفة لحد ما ربنا يكرمهم بحل نهائي لمعاناتهم. بدون اي مكاسب شخصية.

2

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec