16
Jun-2016

ازاي تعمل ميزانية للسفرية؟

travel budget

طبعا من اكتر الحاحات الي بتخوفنا في السفر هي قيود الميزانية … في ظل تدهور العملة المحلية قدام الدولار، أصبح السفر للأسف مكلف اكتر من الاول. والي محوش قرشين و عامل ميزانية للسفر، بيبقى خايف يسافر والميزانية تضرب منه وهو في مسافر. اسئلة كتيرة بتيجي تسألني عن تكلفة رحلة اسبوع او اسبوعين لاسيا او اوروبا تكلف كام؟ السؤال مش بيبقى عن التذكرة والاقامة وبس، كل واحد فينا عايز يعرف الرحلة كلها ممكن تتكلف في حدود كام …. بالبلدي يعني “شاكب راكب بالصلاة على النبي هتكون بكام؟” .

خلينا نقسم مصاريف السفر لنوعين اساسيين، على اساس الزمان والمكان ودرجة التأكد بتاعتها … قلبت دزس فيزاء او احصاء

١- مصاريف ما قبل السفر
دي بتبقى مصاريف سهلة نحسبها لانها بتشمل تكلفة التأشيرة، تذكرة الطيران الدولية، حجوزات الاقامة …. كل ده بتدفعه قبل السفر في السفارة، مكتب شركة الطيران، او اونلاين … ولو ناوي تلف في اوروبا او اسيا، ممكن تحجز المواصلات الاساسية (يعني طيران داخلي، قطر، اتوبيس) بين اكتر من مدينة اونلاين يرضو …. المصاريف دي تمثل جزئ كبير من مصاريف الرحلة و تقدر تكون عارفها بالمليم قبل ما تسافر.
(ياريت ترجعوا لفيديوهاتي الخاصة بنصايح السفر للحاجات دي كلها)

٢- مصاريف أثناء السفر
دي بقى بتبقى اكتر حاجة بنبقى خايفين منها. لانها مجهولة الابعاد تماما. سمك في مية مش عارفين نمسكها. تشمل بقى اكل و شرب، مزارات سياحية، مواصلات داخلية، خروجات ليلية، هدايا و تسوق وكدة.

انا سافرت اكتر من ٣٧ بلد حول العالم، بس عمري ما كتبت مصاريفي كانت كام في الرحلة. لكن عندي انطباعات عامة عن بلاد وقارات معينة. يعني مثلا اوروبا الشرقية ارخص من اوروبا الغربية. اسيا ارخص من اوروبا، افرقيا اغلى من آسيا. في المستقبل بقى لما اكمل سفري حول العالم واستمر في تدوين عن كل تفاصيل سفرياتي، هيكون عندكوا دليل كامل لمصاريف اي بلد زورتها، زي ما انا عملت دلوقتي في رحلتي الاولى في امريكا وانا مردتي قبعة travel blogger مش قبعة السائح. لحد ما اليوم ده ييجي ان شاء الله، هقولكم على موقع لطيف جدا ممكن يساعدنا في حساب مصاريف السفرية المستخبية.

موقع اسمه www.budgetyourtrip.com ….. الموقع ده بكل بساطة بيقولك متوسط مصاريف معيشتك في اي بلد او اي مدينة حول العالم. ممكن تدور بالبلد نفسها (اسبانيا مثلا) او مدينة معينة انت هتزورها (برشلونة مثلا). انا افضل انك تدور بالمدينة لو موجودة عندهم على data base. الموقع ده بيجمع مصاريف المعيشة لمسافرين كتير اوي حول العالم و بياخد المتوسط بتاعهم. الاجمل من كدة كمان، انه بيقولك ٣ مستويات من المصاريف.

Travel Style: a)Luxury B) Mid-Range c) Budget

يعني بالبلدي كده مستوى المسافر الخمس نجوم و المتوسط الحال و الي على قد الحال زي حالاتي كدة. الموقع بيقولك متوسط مصاريف الاقامة، الاكل، المواصلات، الفسح ببعض تفاصيلها لكل بلد. يعني هتلاقيه حاطط مصاريف الاكل في القاهرة في حدود ال120 جنية للمسافر البرنس، 50 جنية للمسافر المتوسط، 20 جنية للمسافر الصعلوك.
يبقى الموقع ده يقدر يقولك متوسط مصاريفك ممكن تكون في حدود قد ايه في بنود مصاريف كتيرة مجهولة بالنسبة ليك. انا لا اثق فيه بنسبة ١٠٠٪ ، لكن في حاجات كتيرة عليه معقولة ومقبولة. ممكن تستخدمه بشكل استرشادى، تعرف منه مصاريفك هتكون في حدود ايه في اليوم. ما تحسبش الميزانية على Budget Traveler الي هو ارخص تكاليف معيشة، علشان بيكون ليه مواصفات معينة وعارف طرق توفير في السفر كتيرة. ممكن نكتب عنها مقالات كتيرة. ابسطها السكن في هوستل مثلا مش في فندق. يطبخ اكله وياكل في مطاعم نادرا، الخ الخ الخ ….. لو لسه مستجد في السفر، نصيحتي اعمل ميزانية على Mid-Range وحاول توفر وانت هناك وتبقى Budget ,مش تحسب على الرخيص وبعدين تتزنق وما تعرفش توفر لقلة خبرتك في السفر ….. اتفرجوا على فيديوهاتي في امريكا وهتشوفوا تفاصيل حياتية يومية هتوفر معاكوا فلوس كتيرة.

تفتح الموقع، تكتب اسم البلد او المدينة الي عايزها، و تجيب بقى ورقة وقلم او تفتح sheet excel و تقعد تكتب بقى ايه المصاريف الي ممكن تصرفها من القايمة دي، ومستوى صرفك ايه فيها …. يعني ممكن اعيش في هوستل واوفر في الاقامة، بس اكل في مطاعم بقى وازبط كرشي. زود عليهم بقى مصاريف غير يومية (متحف، قصر، برج) للزيارات السياحية، استبعد المصاريف الي انت مش هتصرفها، زي الهدايا التذكارية مثلا او الكحوليات ….تاخد بقى المصاريف اليومية المكررة من اكل وشرب ومواصلات وخلافه وتضربها في عدد ايام رحلتك،وتجمع عليهم مصاريف الغير يومية، يبقي انت عندك تصور تقريبي للمصاريف بتاعتك ممكن تكون في حدود كام. زود عليهم كمان بقى نسبة خطأ زي الاحصاء كدة، ١٠٪ ولا ١٥٪ زيادة علشان الطوارئ. (انا كنت شغال في budgeting زمان فكان لازم نخبي حاجة في كم القميص)

( بعض المصاريف قد تكون مشتركة مع اصدقاء رحلتك، زي اوضة في فندق او شقة او ايجار عربية، الحسبة هتكون مختلفة شوية لانك هتقسم ايجار الغرفة او الشقة على العدد)

الاستخدام التاني للموقع هو انك تعمل مقارنة بين بلدين مثلا انت محتار وعايز تزور واحدة فيهم. هديك مثال لبلدين حلوين جدا، لبنان والمغرب. دايما في انطباع كدة ان لبنان علشان ساعة بالطيارة وحوالي ٢٠٠٠ جنية التذكرة، انها هتكون رحلة رخيصة مثلا. لو جبت لحد سيرة المغرب يقولك دي بعيدة وغالية علشان الرحلة حوالي ٥ ساعات وتذكرتها حوالي ٣٥٠٠. لو استخدمت الموقع ده، هيقولك ان تكلفة المعيشة للمسافر المتوسط في لبنان في حدود ٧٣٠ جنية /اليوم وفي المغرب حوالي ٣٧٥ جنية/اليوم (شامل الاقامة). يبقى انت لو عندك اجازة ١٠ ايام. هتصرف في لبنان ٩٣٠٠ (٢٠٠٠ طيران و ٧٣٠٠ معيشة) …. وهتصرف في المغرب ٧٢٥٠ (٣٥٠٠ طيران و ٣٧٥٠ معيشة). يعني الموقع ممكن يساعدك انك تقرر هتسافر فين لو عندك اجازة طويلة. او ممكن يساعدك تسافر فين في ضوء الميزانية الي معاك. الامثلة كتيرة بقى …. لو عملت مقارنة بين بولندا واسبانيا، هتلاقي بولندا ارخص كتير في المعيشة من اسبانيا. هتكتشف ان فيتنام ارخص من تايلاند ٢٥٪ في المعيشة. وهكذا بقى. افتح الموقع وجرب كل البلاد الي في دماغك.

حابب بس افكرك انها حسابات تقريبية قد تكون المصاريف اعلى، علشان كدة زود ١٠-١٥ في المية على الي الموقع بيقوله. الموقع كمان بيبيع travel guides مفصلة تفصيل دقيق للناس الي عايزة تشتريه. ٣ دولار مثلا الواحد.

1

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec