27
Nov-2016

اسافر بشنطة كبيرة ولا صغيرة؟

photostudio_1480247870977

قرار حجم شنطة السفر هيعتمد في الاساس على عوامل كتيرة اوي خلال رحلتك:

١- مدة الرحلة

مدة قصيرة؟

لو انت مسافر لمدة اسبوع تزور مدينة او مدينتن بالكتير، ده معناه انك هتكون مقيم في مكان واحد او مكانين بالكتير. في الحالة دي، السفر بشنطة كبيرة او صغيرة مش هيكون مشكلة كبيرة بالنسبة لك. لانك هتاخد لبس يكفيك الاسوع وخلاص.

مدة طويلة؟

لو مسافر اسبوعين تلاتة مثلا، يبقى الوضع هيكون مختلف، اولا لانك مش هتاخد معاك لبس يكفيك ٣ اسابيع من غير غسيل. لان اختراع الغسلات وصل بلاد برة زي ما وصل بيت ست الكُل.

ثانيا هتكون بتتحرك من مدينة لاخرى ومن مكان اقامة لآخر، يفضل تكون حاجتك خفيفة في الحركة علشان هتعمل packing & unpacking كل شوية

ثالثا، وسيلة مواصلاتك هتفرض عليك حجم شنطة معين ما ينفعش تتجاوزه لو عايز تسافر بميزانية قليلة.

20161017_182307

٥ يورو غسيل وتنشيف في اغلب مغاسل اوروبا

انا بقالي ٣ شهور في اوروبا ومعايا لبس يكفيني اسبوع فقط لاني بعمل زيارة اسبوعية للمغسلة، سواء كانت محل في الشارع، او خدمة في الهوستل او البيت الي مقيم فيه. لو متابعين الفيديوهات، هتلاقوا لبسي مكرر كل مكان، لاني انسان لا اهتم بالمظاهر بصراحة.

٢- محل الاقامة؟

لو هتقيم في هوستل، يبقى يفضل يكون معاك شنطة صغيرة علشان تعرف تخزنها في الدولاب بتاعه وعلشان اوض كتيرة بتكون صغيرة وما تستحملش شنط كبيرة. اما لو نازل في فندق، براحتك بقى، خد الشنطة الي تريحك. شوف النصائح بتاعتي بخصوص الاقامة الغالية والرخيصة والمجانية في السفر.

20160926_154041

معظم اقامتي في اوروبا عن طريق Couch Surfing للاقامة المجانية

٣- وسائل المواصلات؟

لو ناوي على التنقل الكتير بين المدن الاوروبية مثلا، وسيلة المواصلات الي هتستخدمها هتفرق معاك جدا في تكلفة السفر. لو ناوي تسافر بري بين دول شرق اوروبا مثلا، يبقى عندك الاتوبيس او القطر، خد معاك الشنطة الي تعجبك. (احيانا الاتوبيس بيحاسب ١-٢ يورو على الشنطة ولا حاجة). اعرف اسهل طريقة تحجز بيها ايه اتوبيس في المقالة دي. 

لو ناوي تستخدم car sharing زي موقع bla bla car, يبقى يفضل يكون معاك شنطة صغيرة علشان انت هتركب عربية ملاكي مع ناس تانية مسافرة، ما ينفعش تدخل عليهم بشنطة سفر كبيرة. شوف مقالة كاملة عن ارخص وسيلة مواصلات بين المدن الاوروبية.

لو ناوي بقى تعمل رحلة اوروبية بين مدن بعيدة عن بعضها وهتركب طيران داخلي في اوروبا، يبقى لازم تسافر بشنطة صغيرة ذات ابعاد معينة، علشان تتفادى مصاريف شنطة سفر اضافية. تذكرة الطيران بين مدينتين اوروبيتين ممكن تكون ب٣ الى ٥ يورو ولكن مصاريف شحن شطة السفر ٢٥ يورو. شوف المقالة دي وخد بالك من الاخطاء المشهورة عند حجز طيران رخيص في اوروبا. 

20160923_190058

الاتوبيس كان اكتر وسائل المواصلات استخداما في رحلتي الاوروبية

٤- طبيعة الرحلة

شهر عسل/مع المدام/ الاسرة؟

يبقى غالبا هتاخدوا شنطة كبيرة معاكم علشان اقامتك في فندق ومن غير حركة كتيرة، ومحتاج تتصور كل يوم بلبس جديد وفستان جديد وكدة. خليني اقولكم على نصيحة للمسافرين couples. اقسموا شنطكم على شنطتين السفر بتوعكم. يعني لو حضرتك هتاخد معاك لبس لمدة ١٠ ايام، حطه نصه (الداخلي والخارجي) في شنطتك والنص التاني في شنطة المدام. وانتي كمان اعملي كدة، حطي نص لبسك في شنطتك والنص التاني في شنطة البيه جوزك. ليه بقى؟

علشان لو مسافرين ترانزيت الى دولة ما، وحصل تاخير لشنطة حد منكم، فيكون معاكم لبس يكفيكم كذا يوم لحد ما الشنطة توصل بعد وصولكم بيومين تلاتة. اتعرفوا اكتر على خطوات الترانزيت الناجح من المقالة دي. 

20161017_182900

كل الغسيل بتاعي في كيس

سفر اقتصادي؟

لو مسافر budget زي حالاتي كدة، يبقى طبعا خليك في شنطة صغيرة علشان الحركة اسهل واخف وارخص. ممكن تكون شنطة هاندباج بتتجر على الارض او تكون شنطة backpack على الضهر.

٥- هاند الباج Cabin Luggage

لو انت مسافر اي سفرية معاك اي حجم من الشنط، لاي مدة، ولاي غرض …. دي نصيحة عامة …. لازم يكون في الهاندباج بتاعتك لبس يكفيك يومين. علشان ممكن يحصل ا
ي ظروف لشنطة سفرك وتتاخر يومين تلاتة. (بتحصل اكتر في الترانزيت القصير). الافضل يكون معاك حاجتك الاساسية في شنطة ايدك … اكنك طالع الساحل يومين.

حجم الشنطة الهاندباج
؟

– لو هتستخدم طيران داخلي في اوروبا او اسيا بيسمح بشنطة هاندباج Cabin Luggage فقط على الطيارة، يبقى لازم تاخد بالك من ابعاد الشنطة ووزنها بالسنتيمتر والجرام. دي بعض الامثلة مثلا لبعض الشركات.f8f947b34557e897c03799c609f2d184– لو عايز شنطة تتشال على الضهر backpack, يبقى لازم تبقى عارف اولا انها احجام واشكال كتير، لكن وحدة القياس ليهم بتبقى باللتر. الشنطة الي ممكن تطلع معاك الطيارة على ضهرك وتكون مطابقة لمقاسات الهاندباج هي مقاس ال٤٤ لتر. شوف في اللينك ده هتلاقي شركة انجليزي بتبيع الحجم والمقاس ده اونلاين. 

cabin-max-backpack-flight-approved-carry-on-bag-massive-44-litre-travel-hand-luggage-55x40x20-cm-my-cms-2016-11-27-05-54-48

– انا شنطتي backpack ٦٥ لتر، للأسف ما ينفعش اطلع بيها الطيارة من غير ما ادفع عليها فلوس. علشان كده اتفادى الطيران قدر الامكان في التنقل بين المدن الاوروبية حاليا.

ممكن نجيب منين شنطة backpack؟

انا اشتريت شنطتي ال٦٥ لتر من امريكا من سنتين بحوالي ٩٠ دولار. كانت ماركة مجهولة الهوية، لكن عليها ريفيوهات كويسة. الشنط الماركات من ١٥٠ الى ٢٠٠ يورو في اوروبا. اصبح متوفر بدائل دلوقتي في مصر في بعض الاماكن. اعتقد متوفر احجام واشكال مختلفة في محلات اكتيف active في حدود ال٧٠٠ جنية. الي عنده خبرة في الموضوع ده يا ريت يعملي كومنت بصورة الشنطة، سعرها، جودتها، وجابها منين وامتى. علشان ناس كتير بتسأل السؤال دي. شكرا لكم مقدما.

نحط ايه في الشنطة لو مسافرين في الشتاء او في الصيف؟

دي فكرة المقالة الجاية … او عرفوني عايزين اتكلم عن ايه تاني بخصوص الشنط.

2

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec