10
Jun-2016

هنسافر إمتى؟ وهنسافر فين؟ – ١٠ نصائح

photostudio_1465564469724

ايه احسن وقت اروح فيه الهند؟ اسبانيا؟ اندونيسيا؟ فرنسا؟ كينيا؟ امريكا؟

هنسافر إمتى؟ وهنسافر فين؟؟؟ قرارين مرتبطين ببعض بشكل مباشر.

لو أنا نفسي اسافر بلد معينة، يبقى ازاي اعرف  ايه احسن وقت ملائم لزيارتها؟

لو أنا أجازتي في وقت محدد ومحتار اسافر فين، ازاي اعرف اكتر بلد مناسبة في الفترة دي؟

طبعا مفيش اجابة واحدة قاطعة للأسئلة دي. لان افضليات كل واحد فينا مختلفة وطبيعة الي عايز يعمله في السفرية كمان مختلف. كل واحد ممكن يوصل للاجابة الي تناسبه بعد قراءة النقط الجاية دي كويس جدا:

اولا: لازم تكون دقيق في عملية البحث بتاعتك  ….. لما نيجي ندور على النت على أحسن جو لأي بلد قبل السفر، لازم ندور على المدن الي عايزين نزورها. لان دول كتيرة بتكون كبيرة وطبيعتها الجغرافية مختلفة من مكان للتاني، لدرجة ان يكون درجات الحرارة ومواسم الامطار مختلفة اختلافات كبيرة جدا. يعني ما ينفعش حد يتسائل ايه احسن وقت ازور فيه امريكا؟ لانها قارة كبيرة جدا فيها الفصول الاربعة في كل مكان في وقت مختلف. فلوريدا تتراح في ديسمبر. نيويورك في اغسطس، وهكذا. حتى بلد صغيرة زي سريلانكا مثلا، فيها مواسم للأمطار مختلفة في الشمال عن الجنوب. 

تانيا: اهم عاملين نشوفهم علشان نعرف ايه احسن جو مناسب لزيارة اي مدينة هم درجات الحرارة والامطار. احنا علشان عايشيين في مصر (زي ما حفظونا في الجغرافيا زمان، حار جاف معتدل صيفا، بارد معتدل مردو شتاء) …  طول عمرنا بنربط الامطار بدرجات الحرارة المنخفظة. يعني لما تكون شتاء والدنيا برد بيكون في امطار ولما الجو يكون حر مفيش امطار. اكتشفت ان دي اكذوبة لما سافرت بلاد جنوب شرق اسيا مثلا، الي الطقس فيها تروبيكال، يعني درجات الحرارة معتدلة طول السنة، بس عندهم مواسم للامطار. اسمها monsoon . في بعض الاحيان بيكون موسم امطار متواصلة، عامل زي “النوة” بتاعتنا في اسكندرية.

ثالثا: من احسن المواقع الي على النت علشان معرفة متوسط درجات الحرارة والامطار لاشهر المدن السياحية في العالم موقع اسمه www.thebesttimetovisit.com …. الموقع فيه ميزتين اساسيتين:

– لو انت عارف ميعاد اجازتك في شهر كام، ممكن يقترح عليك دول تزورها في الوقت ده من السنة. ممكن كمان تختار شوية عوامل في عملية البحث علشان تلاقي حاجة مناسبة لمزاجك:

١- الشهر الي عايز تسافر فيه

٢- القارة الي عايز تكون فيها اجازتك

٣- متوسط درجة الحرارة الصغرى

٤- متوسط درجة الحرارة الكبرى 

٥- اقصى عدد ايام ممطرة في الشهر (من ١ الى ٣١)

لو اي عامل من دول مش فارق معاك في حاجة، يبقى اختار “i don’t care” 

الموقع هيطلع ليك نتائج البحث المختلفة لكل مدينة مناسبة للزيارة في الوقت والظروف الي انت اخترتهم. ممكن ترتب نتائج البحث الي طلعت بعوامل كتير. درجات الحرارة، عدد ايام المطرة في الشهر، او التصنيف (بيكون من الاحمر الى الاخضر – السئ الي الجيد). 

تعالوا نجرب مثلا ندور على حاجة مناسبة في شهر يوليو، قارة اسيا، درجة الحرارة الصغرى ٢٠ والكبرى ٣٥، وعدد ايام المطر في الشهر ١٠ ايام  …. هيرشح ليك ١١ مدينة للزيارة، واحسن ٣ فيهم هيكونوا في اندونيسيا.

TheBestTimeToVisit : When To go Where - Best Weather & Climate around the World! 2016-06-10 11-52-13

TheBestTimeToVisit : When To go Where - Best Weather & Climate around the World! 2016-06-10 14-50-52

رابعا: الموقع كمان بيقدم خدمة ثانية لطيفة جدا، الا وهي انه بيقولك على احسن وقت تقدر تزور فيه اي بلد ايه. في خدمة اسمها country guide … يعني انا عايز اسافر العاصمة الفرنسية باريس تحديدا في اوروبا، ايه احسن وقت اروح فيه؟

تفتح country guide هتلاقي القارات، تختار اوروبا، هيفتحلك قائمة بالبلاد الاوروبية، تختار فرنسا، هيفتحلك قائمة بالمدن الفرنسية الموجودة بالموقع. قدام كل مدينة درجات والوان بتقولك ايه احسن وقت تروح فيه في أشهر السنة.  لما تختار باريس، هيفتحلك صفحة كاملة بدرجات الحرارة التاريخية ومؤشرات الامطار لباريس على مدار ال١٢ شهر في السنة. 

Europe - TheBestTimeToVisit : When To go Where - Best Weather & Climate around the World! 2016-06-10 12-51-45

خامسا: هل أحسن وقت مقترح للزيارة لاي بلد بيكون فعلا هو أحسن وقت للزيارة؟ الموضوع بيختلف من واحد للتاني. انا مثلا كان نفسي اشوف ثلج انا وبنتي لما سافرنا سويسرا، فاخترت وقت من السنة يكون فيه ثلوج لسه على الجبال علشان نزورها. كنت عايز أخد بنتي ديزني لاند باريس، فاخترت ان احنا نروح في اجازة نص السنة في الشتاء مش في اجازة الصيف، لان ديزني لاند بتكون فاضية جدا (خصوصا في ايام الاسبوع مش في الويك اند). في الموسم العالي في الصيف، ممكن تقضي ١٢ ساعة في ديزني وتركب نص الالعاب الي ممكن تركبها في الشتاء. احيانا كتير تذاكر الطيران والاقامة بتكون أرخص في المواسم النايمة لاي بلد. علشان تزور ريو دي جانيرو في شهر فبراير (الكارنيفال)، مش هتلاقي ولا فندق رخيص، واقل اقامة لازم تكون اسبوع، وغالية جدا. 

سادسا: هل درجة الحرارة والامطار هم اهم حاجات بالنسبة لحالة الطقس؟ احيانا بعض السفريات بيكون فيها عوامل اخرى مهمة زي سرعة الرياح مثلا. بعض الانشطة زي SKYDIVING او PARAGLIDDING بيحتاجوا مواصفات جو معينة علشان تقدر تعملهم. لما كنت في تركيا انا وبنتي نور، كنا عايزين نعمل PARAGLIDDING (النط بالباراشوت من فوق جبل). اول ما وصلنا المدينة، اول حاجة سألت عليها في مركز القفز هي امتى انسب وقت نعمل فيه القفزة بالباراشوت دي؟ الراجل فتح موقع لتوقع سرعات الرياح واتفق معايا على ثالث يوم ليا في زيارة المدينة. بالفعل اول يومين ما شوفتش ولا باراشوت في السماء، ثالث يوم ظهروا في السماء فجأة علشان الجو بقى حلو وقدرنا نعملها.

بعض الشواطئ بتكون ممنوع نزول المية فيها لو الأمواج عالية مثلا. ممكن تلاقي اونلاين مواقع لتوقع الاحوال الجوية لشواطئ معينة لو انت عايز تعمل اي رياضات مائية في الشاطئ.

مستوى منسوب المية في بعض الانهار ممكن يكون مهم انك تعرفه لو ناوي تعمل رياضة مرتبطة بالنهر ز rafting مثلا. مش مجرد انا سمعت ان فيه rafting حلو في النهر ده يبقى اروح، لا طبعا، في مواسم في الموضوع ده لازم تكون مدور عليها قبل ما تسافر لو ده حاجة مهمة بالنسبة ليك.

طبعا الجماعة المتخصصين في الرياضات زي التزحلق على الجليد والwind/kite surfing بيكونوا اكيد عارفين الظروف المناخية المناسبة للرياضة بتاعتهم قبل السفر.

سابعا: قبل ما تسافر أي بلد، لازم تشوف توقعات الارصاد الجوية كل يوم قبل السفر باسبوع مثلا. لان الدرجات الي شوفتها قبل كدة دي مبنية على بيانات تاريخية. لكن التوقعات الجديدة هتكون اكثر دقة. لما توصل البلد الي انت رايحها، لازم تشوف توقعات الارصاد كل يوم برضو. لان احيانا بعض الانشطة او الزيارات بتحتاج جو معين. يعني طلوع جبل ولا زيارة جزيرة بعيدة في اندونيسيا مثلا، حاول تختار يوم من غير مطرة مثلا علشان تعمل الرحلة دي. 

ثامنا: أثناء السفر، من الأفضل انك تشوف توقعات الارصاد على مدار اليوم. توقعات كل ساعة شكلها ايه. hourly basis . انا مرة زمان اشتريت ٣ شمسيات في لندن خلال اسبوع علشان كنت كل ما اشوف الجو خلال اليوم الاقيه مفيش مطرة،  لكن فجأة يمطر لمدة ساعة. توقع اليوم على بعضه مش بيقول انه يوم مطر لانه هيمطر وقت صغير اوي. لما تفتح بقى التوقعات بالساعة، هتلاقي تفاصيل الطقس ساعة بساعة. هتلاقيها على جوجل بكل بساطة. اكتب London Weather مثلا، هيطلع دجات الحرارة لمدة اسبوع و توقعات الطقس على مدار اليوم الي انت فيه. ساعة بساعة. هتلاقيه مشمس الصبح وجاف، وبالليل برد وممطر شوية. 

london weather - Google Search 2016-06-10 14-10-41 london weather - Google Search 2016-06-10 14-11-54

تاسعا: ممكن تسأل google بكل بساطة best time to visit اي مكان على بالك، وهتلاقي مواقع سياحية كتيرة بتتكلم عن المكان الي انت عايز تروحه وكاتبه مميزات زيارته في الوقت ده من السنة. شوية قراءة لكام موقع وهيكون عندك فكرة عامة عن احسن الاوقات للزيارة. الي ممكن ما تكونش مرتبطة بحالة الجو فقط، ولكن مرتبطة بأعياد، كارنفالات، مناسبات دينية، مواسم تخفيضات للتسوق.

عاشرا: لو عايز تزور بلاد افريقية علشان تعمل سافاري وتشوف الحيوانات، لازم تعرف مواسم هجرة الحيوانات علشان لما تروح تعمل سافراي تلاقي حاجة تشوفها. انا مثلا سافرت كينيا في اول شهر اكتوبر من كام سنة، وكان الوقت ده من السنة بداية هجرة الحيوانات الى تنزانيا في الجنوب. كان هيبقى افضل لو زورتها في شهر سبتمبر. يبقى لما تيجي تسأل جوجل عن كينيا، تسأله بالتفاصيل المهمة best time to do safari in kenya . علشان مش تبقى الاجابة مرتبطة بالجو فقط، ولكن بطبيعة النشاط الي بيتعمل هناك.

شير المقالة مع صحابك الي مسافرين قريب 🙂

Instgram: couch_traveler

Snapchat: couchtraveler

7

 likes / 2 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec