13
Oct-2016

اخطاء ركوب الاتوبيس في اوروبا

 photostudio_1476356673194

طبعا اسهل وارخص وسائل المواصلات في اوروبا هي الاتوبيس. اسهل علشان بتركب اتوبيس من مدينة وتنزل في المدينة  الي بعدها، لكن القطر، علشان تركب ارخص حاجة، احيانا بتحتاج تغيير القطر مرة او اتنين – ترانزيت يعني. انا احيانا بستخدم موقع goeuro علشان الاقي ارخص وسائل المواصلات.

انا شخصيا لحد دلوقتي في رحلة اوروبا، استخدمت الاتوبيس اكتر حاجة، وبستخدم Flixbus لان بيغطي حتت كتيرة في اوروبا، مريح، في فيشة كهرباء اشحن بيها، ومواعيده كويسة.

عايز اقولكم على غلطتين عملتهم في استخدامي للاتوبيس خلال الشهر الي فات، علشان تتجنبوهم وانتوا مسافرين بعد كدة:

١- اقرأ تذكرة الاتوبيس كويس قبل السفر

لما بتشتري تذكرة الاتوبيس من على اي موقع، هتتبعتلك على الايميل. لازم تفتحها و تحفظها في تليفونك. اقراها كويس علشان تعرف محطة الركوب فين. طلعها على google maps علشان تعرف توصل بسهولة.

screenshot_20161013-125400

تاني حاجة وانت بتقر التذكرة، تاخد بالك من اي ملاحظات مكتوبة جنب المواعيد والمكان. ليه بقى؟

قبل مغادرتي للعاصمة الكرواتية زغرب، اشتريت التذكرة الساعة ١٠ بالليل اونلاين علشان اركب الاتوبيس تاني يوم ٧ الصبح. (مش لازم احجز قبلها بكتير، السعر مش بيتغير)

علشان الصبح بدري الساعة ٦.٣٠ الصبح، وعلشان كمان الاوبر رخيص، اخدت تاكسي اوبر ب٢.٥ يورو، وصلا المحطة قبلها بربع ساعة – سألت فين الرصيف بتاع Flixbus, لحد ما لقيته. سألت كام واحد واقفين “بودابيست ان شاء الله يا جماعة؟” …. ايوة!!!  …. فعرفت اني واقف في المكان المزبوط.

وقفنا انتظرنا الاوتوبيس …. نص ساعة عدت – ساعة – ساعة ونص. مفيش اتوبيس. كنا ٤ اشخاص منتظرين الاتوبيس. واحد مننا اتصل بالشركة قالوله الاتوبيس جه ومشي!! ازاي طيب؟؟ حاولنا نفهم ايه المشكلة لحد ما موظف الشركة شرح لنا.

كان مكتوب في التذكرة بخط احمر صغير ان الرحلة دي هتكون عن طريق شركة اتوبيسات مجرية اسمها volanbusz ، احنا كنا واقفين منتظرين اتوبيس flexbus  الاخضر في برتقالي، بينما المفروض كنا ننتظر لاتوبيس تاني خالص، لونه واسمه مختلفين، وبيقف في مكان تاني خالص في المحطة.

يوجد كمان تطبيق لشركة Flixbus ممكن تشتري من عليه التذاكر. واحد امريكاني من الي كانوا معانا اشترى التذكرة من عليه، ولم يوجد في التذكرة في application اي ذكر لشركة تانية هتكون مكان flixbus في الرحلة. علشان كدة التذكرة الي على الايميل اهم وهيكون فيها جميع البيانات.

screenshot_20161013-125440

طيب والعمل يا جماعة؟ التذكرة ب٢٠ يورو؟ هنشتري واحدة تانية؟  …. قالولنا خلاص هنبعتلكم تذاكر تانية على الايميل …. ببلاش!!!

بصراحة ناس ذوق اوي. كان في رحلة الساعة ٣.٣٠ العصر، من نفس المحطة رايحة بودابيست. بعتولنا التذاكر على الايميل بعدها فعلا والحمدلله ركبنا.

مش لازم تطبع التذكرة وانت رايح. وريها للسواق من على التليفون فقط. لازم جواز سفر علشان يتأكد من اسمك عنده في اسماء الركاب. علشان الاتوبيس كان بيعبر من دولة كرواتيا، خارج منطقة الشنجن، ورايحين دولة المجر، داخل منطقة الشنجن، سواق الاتوبيس كان بيشوف التأشيرة كمان علشان يتأكد من امكانية دخولك الى منطقة الشنجن. زي موظف كاونتر شركة الطيران في المطار، لازم يتأكد ان معاك التأشيرة علشان تركب الطيارة وتسافر.

٢- ليه بقى انا كنت بعيط لما ده حصل؟؟

لاني قبلها بحوالي ٣ اسابيع، مالحقتش الاوتوبيس بتاعي من فينيسيا في ايطاليا الى فيينا في النمسا – والي كان الصبح بدري اوي – وكانت رحلة ٩ ساعات والتذكرة ب٥٠ يورو – يعني نفخ!!! للأسف كنت مضطر اشتري تذكرة تانية ب٥٠ يورو تانيين علشان اركب الاتوبيس بتاع رحلة بالليل.

الدرس المستفاد، لو لا قدر الله، ما لحقتش الاتوبيس بتاعك – حاول تكلم الشركة وتطلب تذكرة تانية وتتحجج باي حجة، وان شاء الله هتاخد تذكرة تانية. لو حد حصل معاه موقف مشابه يا ريت يحكي الي حصل معاه.

ملحوظة- ما تحاولش تعمل كدة في تذاكر الطيران budget علشان مش هيدوك تذكرة تانية. تذاكر الطيران الدولية لو ملحقتهاش، ببتحسب no show وبتدفع غرامة وتاخد تذكرة تانية.

 

 دي الاخطاء الي انا عملتها لحد دلوقتي – لو حصل مواقف تانية، هكتب عنها تاني. مسافر انا علشان اكون حقل تجارب اخطاء علشان تتعلموا من المصايب بتاعتي 🙂 

الحدود الكرواتية – المجرية – في اتوبيس Flixbus المرة دي 🙂

20161013_125818

5

 likes / 3 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec