29
Sep-2016
Sep-2016
أرخص وأحلى مواصلات في أوروبا
التنقل بين المدن الاوروبية دلوقتي بقى اسهل وارخص بكتير. طول عمري في اوروبا استخدم الاتوبيس والقطر علشان اتحرك من بلد للتانية. زي ما شرحت في فيديو قبل كدة, موقع Rome2rio.com بيطلع كل وسائل المواصلات بين اي مدينتين في العالم … سواء أتوبيس او قطر او طيارة او تاكسي او حتى مركب. لكن الموقع عمره ما ذكر احدى اهم المواصلات دلوقتي في اوروبا … bla bla car … موقع اتعمل من كام سنة علشان الناس تتشارك المشاوير الطويلة او القصيرة بعربياتها الشخصية car pooling / sharing , بشكل منظم وفعال. نقدر نقول عليه Airbnb بتاع المواصلات.
اثناء رحلتي الاوروبية دلوقتي, بحجز قطر او اتوبيس من خلال موقع اسمه www.goeuro.com … بيعمل مقارنة بين اسعار الطيارات و الاتوبيس والقطر والعربيات المشتركة في اليوم المحدد الي انا عايز اسافر فيه, وبيحولني على موقع الحجز مباشرة.
وانا مسافر من العاصمة النمساوية “فيينا” الى العاصمة السلوفانية “لوبليانا”, لقيت على الموقع ده اسعار القطر 70 يورو, الاتوبيس 35 يورو, و bla bla car كانت 18 يورو. (بتظهر تحت تصنيف الاتوبيس)
قولت اما اجربه علشان اعرف نظامه ايه, خصوصا ان سعره اقل من النص ومن التلت مقارنة بالاتوبيس والقطر.
استخدام الموقع سهل وبسيط اوي. بتعمل بروفايل عليه بحساب الفيسبوك بتاعك في ثواني… وبتقدر تتواصل من خلاله مع سواقين العربيات الي مسافرين في المواعيد المختلفة.
لقيت عربيتين مسافرين في اليوم ده, واحدة الضهر وواحدة العصر. بعت رسالة لكل واحد فيهم وردوا عليا على طول وبعتولي ارقام whatsapp بتاعتهم. اتكلمنا شوية وقررت اركب مع الي مسافر الساعة 4. اداني مواصفات العربية وارقامها العنوان الي انتظره فيه.
تاني يوم روحت لقيت العربية الفان الكبيرة دي منتظرة قبل الميعاد في المكان المتفق عليه بجوار محطة القطارات الرئيسية غي فيينا. اتعرفت على السواق وطلع شغال مهندس كمبيوتر في النمسا واصلا من سلوفانيا. على طول رايح جاي على الطريق بين البلدين. بياخد معاه ناس وهو رايح وهو راجع. ركب معانا في الرحلة حوالي 6 اشخاص.
بصراحة كانت رحلة ممتعة وسهلة وسريعة ورخيصة … دائما هتلاقي اسعارهم ارخص من المواصلات العادية علشان يجذبك تركب معاه.
بس للأمانة برضو, علشان تضمن الموضوع يمشي معاك كويس, لازم قبل ما تختاروا السواق الي هتركبوا معاه او معاها تشوفوا البروفايل وتقروا تعليقات الناس. لان في الاول وفي الاخر انت الي بتختار السواق الي بتركب معاه. هو شخص بيقدم خدمة عن طريق موقع. الموقع لا يضمن جودة الخدمة 100%.
(ده البروفايل بتاع السواق الي ركبت معاه. معمول ليه تقيمين اتنين فقط. بس كان كويس جدا وعملتله تقييم جديد)
تخيل نفسك رايح تركب بيجو 7 راكب من موقف عبود, بس كل سواق عنده بروفايل مكتوب فيه مميزاته وعيوبه. نفس الكلام على موقع bla bla car, موقف عبود الكتروني متطور.
زي موقع booking.com مثلا, موقع عالمي لحجز الفنادق, بس عليه فنادق كتير وحشة جدا والخدمة فيها زي الزفت. لكن مكتوب لكل فندق تقييم من نزلاء كتير. مهمتك انك تقرا التعليقات وتشوف الريفيوهات قبل ما تحجز اي حاجة. نفس الكلام في موقع bla bla car. انا شخصيا علشان راجل و risk taker فركبت مع واحد عنده تقيمين اتنين فقط.
لو انت بتقلق من تجربة حاجة جديدة زي دي، دور على سواقين عندهم ريفيوهات كتيرة على الموقع وبقالهم كتير مشتركين فيه.
لو انت بنت وخايفة تجربيه، ممكن تدوري على بنت تركبي معاها ويكون عندها ريفيوهات كتيرة.
لو حد عنده تجارب حلوة او وحشة مع الموقع، يا ريت يشاركنا بيها في التعليقات علشان كلنا نعرف.
انا في رأيي الشخصي انه موقع مفيد جدا للسفر الرخيص. تجربتي الوحيدة فيه كانت كويسة جدا. هجربه كل ما تيجي فرصة علشان موفر جدا جدا. استخدموا موقع goeuro.com علشان تلاقوا عربيات bla bla car بسهولة جدا.