18
Aug-2016

كشف حساب البنك يكون فيه مبلغ قد ايه؟

img_9333-1أحد اهم طلبات اي سفارة في اوروبا او امريكا، كشف حساب بنكي لمدة من ٣ الى ٦ شهور، علشان يتأكد انك قادر ماديا على السفر. 

زي ما شرحت في مقالة قبل كدة اهمية انك تقدم كشف حساب مرتبك ويكون مبين حركة الحساب بالمرتب والمسحوبات الشهرية، مع الابقاء آخر كل شهر على فائض مالي يدل على قدرتك على السفر والانفاق. كمان حذرت من وضع مبلغ مالي كبير قبل طباعة كشف الحساب بيومين، علشان مفقوسة وشكلها وحش.  

يبقى حضرتك تكون عامل حسابك ان في مبلغ هيفضل في الحساب آخر كل شهر لمدة ال٦ شهور الجايين، علشان لما تطبع كشف الحساب يكون الرقم ده موجود اخر كل شهر. 

كام بقى الرقم ده؟ 

من اصعب الاسئلة الي بتيجي ليا. لان الموضوع نسبي وبيختلف من سفارة للتانية. يهم السفارة ان يكون معاك مبلغ مالي كافي لمصاريف رحلتك وزيادة. يعني لو بتقدم على الشنجن، ممكن تحسب لرحلة اوروبية مبلغ ١٠٠ يورو في اليوم، فانت لو مسافر اسبوعين، الحد الادني للرصيد المفروض يكون مثلا في حدود ١٤٠٠ يورو الي ٢٠٠٠ يورو. انت مش هتصرف كدة طبعا، بس في السفارة ممكن يكونوا بيحسبوا على ارقام اعلى.  

 لو بتسحب مرتبك الشهري كله من حسابك كل شهر ومفيش فائض، يبقى تحط ما يعادل المبالغ دي بالمصري في حسابك من قبل التقديم على اي سفارة بفترة ٦ شهور.  

لو عندك حسابات بنكية فيها ودائع او حسابات توفير في البريد حتى، اطبعها وقدمها مع كشف حسابك. المطلوب انك تثبت انك مقتدر ماديا ولا تنوي الهرب الي اوروبا او امريكا. ممكن ما يبصوش فيهم خالص، بس يكونوا معاك احتياطي.  

لو انت طالب، ومعندكش حسابات بنكية باسمك، تقدم الحسابات الخاصة بكفيلك الخاص، والدك والدتك عمك خالك خالتك … الي بيتعهد بالصرف عليك في الرحلة، مع ما يثبت صلة القرابة لو درجة ثانية. 

القاعدة العامة في لغة الاحتمالات – نسبة حصولك على التأشيرة اعلى بكشف حساب كبير عن كشف حساب صغير … انا بتكلم بلغة الاحتمالات … علشان محدش يقولي انا حسابي كان فيه ٣٥ جنية واتقبلت. انا بقول احتمالات اعلى. 

انا متأكد ان في ناس اخدت التأشيرة بمبالغ صغيرة ومتوسطة، يا ريت كل حد اخد تاشيرة اوروبا او امريكا اول مرة قريب وفاكر رصيدة في الحساب البنكي يقولنا رصيده كان كام  … ومش هنحسده والله :)… هل كان تحت ال١٠ الاف جنية ولا بين ١٠ الى ٢٠ ، ولا بين ٢٠ الى ٣٠ ؟…. علشان نقدر نتحسس مع بعضينا يعني كدة رقم يكون هو الحد الادنى للتقديم. شكرا على حسن تعاونكم 🙂 

46

 likes / 72 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec