29
Aug-2016

٥ بلاد فقط، من اسطورة الخمسين بلد، يصلحوا للسفر بدون تأشيرة

 comic1

هل تعلم انك بالباسبور المصري فقط ممكن تطلع بكرة الصبح على كل الدول دي: ميكرونيسا وسانت كيتس ونيفيس وسانت فينس وجريندين وبالوا وساموا ومش كدة وبس، وكمان توفالو وتيمور ليسته وكيب فردي وانتيجوا وباربودا  ….. ملكش حجة انك ما تسافرش بقى 🙂

طبعا محدش يعرف البلاد دي معانا على كوكب الأرض اصلا ولا على كواكب اخرى في مجرة درب التبانة؟ أقسم بالله ولا انا كمان اعرف هي فين. بس هى دول ضمن قائمة دول أخرى موجودة دائما في مقالات كتيرة على الانترنت ومنتشرة جدا جدا … علشان تحمس الشباب الصغير على السفر لبلاد الله الواسعة ومش لازم يسافروا دول تأشيراتها صعبة. (القائمة كلها هنا من صفحة ويكيبيديا)

 الدنيا مش سودة اوي كدة يا جماعة، معانا في الليستة دي دول كتير احنا عارفنها …  مجموعة من الدول دي فيها حروب آهلية او حدودية كمان ممكن نفكر فيها لما الاطراف المتنازعة تمضي اتفاقية سلام قريب، اليمن والسودان مثلا …. ومعانا كمان في الليستة الحمدلله بلاد قوات حفظ السلام الدولي متواجدة فيها بقالها فترة زي جيبوتي ورواندا واوغندا والجابون وغينيا بيساو وزمبابوي.

Visa_requirements_for_Egyptian_citizens

خلينا نتكلم كفيين يا كابتن مدحت، دلوقتي انا راجل حوشت قرشين ونفسي اسافر اشوف دنيا جديدة، ايه الي يخليني اروح بلد معرفش انطق اسمها اصلا، ولا بلاد معرفش عنها حاجة اصلا، ولا داخلة او خارجة من حرب، او بلاد اكثر فقرا وتخلفا مننا، او بلاد بعيدة جدا جدا عننا وعمرها ما كانت في قائمة اولوياتي في السفر.

انا مثلا بعد ما سافرت ٣٠ بلد، ابتديت افكر برة الصندوق واروح فعلا بلاد محدش راحها زي كوبا وكمبوديا وغانا وايران وافغانستان، بس ده بعد عمر طويل في السفر. ونفسي كمان جدا ازور اليمن مثلا وكل الدول الافريقية الي ذكرتها.

النهاردة اول مرة تسافر وعايز تروح بلد من غير تأشيرة ووجع دماغ، بس تكون حلوة ورخيصة ممكن تزورها وتقضي اجازة حلوة جدا جدا … قائمة الخمسين بلد الي من غير تأشيرة او تأشيرة عند الوصول، هي قائمة حقيقية فعلا يا جماعة، بس مش واقعية على الاطلاق. علشان كدة انا اخترت ليكم ٥ بلاد فقط ارشحهم ليكم للسفر فورا :

١- ماليزيا … طبعا من احلى بلاد جنوب شرق اسيا جداجدا … ومليانة مدن وشواطئ وجزر ممكن نروحها. تنفع تسافرها لوحدك لانها مليانة مسافرين من كل حتة، وتنفع تاخد مراتك شهر عسل، وممتازة للأطفال كمان. تذاكر الطيران ليها معقولة والاقامة والمعيشة رخيصة.

Ma2l

٢- اندونيسيا …. جزيرة بالي جنة الله على الارض … تنفع لجميع الاعمار والمناسبات. عازب. متزوج. اب. ام. فيها كل حاجة. زيها زي ماليزيا، بس الطيران اغلى شوية.

IND1

٣- المالديف … مفيش احلى من كدة جزر وشواطئ على المحيط وحاجة اخر حلاوة. بس نصيحة اخوية … اوعى تروح هناك لوحدك!! لازم تكون في شهر العسل. لانها couples بس والله يا جدعان. لوحدك هتكون مملة جدا. اللهم بلغت. ماليزيا او اندونيسيا فيهم شواطئ حلوة برضو، ونفس الوقت فيهم حياة المدينة الصاخبة.

mald2

٤- تنزانيا …. من اجمل بلاد شرق افرقيا … أحلى حاجة هناك طبعا جزيرة زنزبار … حاجة كدة ولا الخيال. لو ما تعرفش هي فين، تقول انها في المالديف مثلا. ممكن تروحها تقضى فيها اجازة مختلفة جدا. وفيها سياح واجانب كتير جدا جدا. مش هتحس انك الرجل الابيض الوحيد في البلد. ممكن كمان يتعمل هناك سافاري في الادغال وتسلق جبل كاليمانجارو، بس انشطة غالية للأسف. (جارتها الشمالية كينيا برضو حلوة زيها – ومومباسا شواطئ حلوة زي زنزبار)

tan

٥- الأردن … من البلاد العربية الجميلة جدا الي تستحق الزيارة فعلا. عمان طبعا العاصمة حلوة جدا. مدينة تكسوها الثلوج في الشتاء زي اوروبا بالزبط. فيها احلى اكل اردني/فلسطيني في الدنيا. تنوع جغرافي بديع. وادي رم، البتراء، البحر الميت، العقبة. ممكن تطير من القاهرة لعمان وتتجه جنوبا لحد العقبة، ومنها ترجع بالعبارة على ميناء نويبع في سيناء. ويبقى عملت رحلة بحرية كمان في الرجوع. (جارتها لبنان طبعا مفيش احلى من كدة، وممكن تأشيرة عند الوصول، بس لو معاك ٢٠٠٠ دولار كاش وانت داخل من المطار).

jo2r

بس للأسف عندي خبر مش لطيف للطلبة والعاطلين …

ماليزيا واندونيسا و الاردن من البلاد الي محتاجة تصريح امني وبعضهم بيحتاج تأشيرة مسبقة قبل السفر. لو شغال، مفيش مشكلة. اخواتنا الطلبة الي طلعوا تأشيرات علشان ياخدوا التصريح الامني، يا ريت يشاركونا خبرتهم في الموضوع علشان ننزله بوست قريبا.

 طبعا في دول كمان  حلوة كتير ممكن زيارتها من غير تأشيرة او تأشيرتها عند الوصول، ولكن ممكن زيارتها مع بلاد تانية او بعيدة جدا وغير منطقية:

هونج كونج … حلوة طبعا. بس صغيرة انك تسافرها لوحدها. روح معاها بلد اسيوية اخرى.

كوريا الجنوبية، للأسف بترجع بعض المصريين الي شاكه فيهم انهم هيهربوا هناك

 كمبوديا ولاوس من احلى بلاد جنوب شرق اسيا وممكن زيارتهم مع ماليزيا مثلا او اندونيسيا بس احنا مش عارفنهم

بوليفيا وبيكاراجوا والاكوادور في امريكا الاتينية حلوين طبعا ، بس اقل تذكرة معدية ال١٠-١٢ الف جنية.

الي سافر بلاد من اليستة دي يا ريت يعرفنا تجربته علشان الجميع يستفيد منها ويمكن اغير رأيي. 

 

17

 likes / 10 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec