22
Oct-2016

ممنوع من الترانزيت في اوروبا

photostudio_1477167818284

شرحت المقالة الي فاتت ان مفيش حاجة اسمها تأشيرة ترانزيت في اوروبا. يوجد فقط تاشيرة الشنجن العادية لدخول اوروبا. لكن في حالتين فقط، بيكون ممنوع تعمل ترانزيت في اوروبا بدون فيزا شنجن واحيانا بيمنعك موظفين شركة الطيران من ركوب الطيارة اصلا.

١- لو هتعمل ترانزيت في اكتر من بلد اوروبي

مسافر مثلا من القاهرة الي روسيا، ولقيت تذكرة رخيصة على احد مواقع البحث، بتعمل ترانزيت مرتين في المانيا مثلا. يعني تركب القاهرة – فرانكفورت ، بعد كدة فرانكفورت – ميونخ – وبعد كدة ميونخ – موسكو. يبقى التانزيت بتاعك في هذه الخالة يتطلب ركوب طيران داخلي بين مدينتين اوروبيتين، مما يتطلب تاشيرة دخول منطقة الشنجن.

في ناس اتمنعت من السفر من مطار القاهرة قبل كدة بسبب الغلطة دي. ركزوا في الترانزيت بتاعكم هيكون فين وهل نحتاة تغيير مطارات داخلية ولا مش محتاج.

٢- لو هتعمل ترانزيت واحد في مطار اوروبي، بس موظف شركة الطيران شاكك فيك

يعني ايه الكلام ده؟؟ للاسف يا جماعة الحادثة دي اتكررت كتير مع ناس كانت مسافرة الي امريكا الجنوبية.

واحد قرر يسافر بلد تاشيرتها سهلة، البرازيل او الارجنيتن. طلع التاشيرة وحجز الفنادق، وكانت ارخص تذكرة طبعا للسفر الى امريكا الجنوبية عن طريق ترانزيت في اوروبا، كلهم بيروحوا امريكا الجنوبية باسعار ارخص من الطياران الخليجي، الاماراتية والقطرية او حتى التركي.

المفروض المفروض، انك مش محتاج تاشيرة ترانزيت علشان تعمل ترانزيت في مطار امستردام وانت مسافر من القاهرة الى ريو دي جانيرو. بتوصل مطار امستردام، تركب الطيارة الي رايحة البرازيل من غير ما تسيب المطار او تدخل هولندا اصلا.

لكن في الآونة الاخيرة، سمعت عن ناس كتير تم رفض ركوبهم الطيارة المتجهة من القاهرة الى احدى المدن الاوروبية للترانزيت فيها لتكملة الرحلة الي بلد غير شنجن. ليه ده حصل رغم انه لا يحتاج الى تاشيرة؟؟؟

للاسف في ناس كانت بتشتري تذكرة طيران الى بلد غير اوروبية وتعمل ترانزيت في بلد اوروبية، واول ما توصل المطار الاوروبي علشان تعمل ترانزيت، تروح مقطعة جواز السفر بتاعها ورامياه في حتة علشان ما يعرفوش هو جاي منين بالزبط، وتطلب لجوء وهي في مطار البلد. شركات طيران اوروبية كتير تعرضت الى غرامات فادحة من ركاب كتير عملوا الحركة دي للاسف. اصبح من حق موظف شركة الطيران من مطار المغادرة انه يرفض ركوبك الطيارة لو كان شاكك انك ناوي تعمل كدة. احيانا بدون ابداء اي اسباب.

يعني مش عارف المفروض الواحد يروح يركب الطيارة وواخد معاه  كشف حسابه البنكي وجواب من الشغل اكنه رايح يقدم على تاشيرة مش رايح يركب طيارة؟؟؟

اوضح لي احد اصدقاء الصفحة، والي شغال في شركة طيران، ان الموظف بيرفض الي جواز سفره ابيض خالص ولم يسافر من قبل اي مكان، مكتوب في جواز السفر طالب او عاطل، او مسافر بتذكرة ذهاب من غير عودة، او مش معاه حجز فندق، او مش معاه فلوس للسفرية، او مش معاه حتى شنط … في حاجات كتير بتخلي الوظف يشك ويمنع الراكب من رحلته.

للاسف في ناس بتكون معاها كل الحاجات دي، والموظف برضو ممكن يرفض ركوبك الطيارة. هو كدة وخلاص. الي حصل معاه موقف مشابه، يا ريت يحي لينا عليه علشان نعرف عمل ايه وكانت ايه ظروف المنع الي حصلت ليه.

طيب وايه الحل في الموضوع ده؟

المفروض لو تم منع الراكب من السفر من الشركة، يسترد ثمن التذكرة كاملا ما دام التذكرة متاحة للبيع اونلاين ومش مكتوب اي شروط تمنع الراكب من ركوب الطيارة.

ممكن يعملوا خدمة مرافق للركاب الي شاكين فيهم. ياخدهم بالجوازات بتاعتهم لحد الطيارة التانية المتجهة الى المحطة الي بعدها مثلا.

الخلاصة

لو جواز سفرك لسه ابيض يا ورد، وناوي تسافر الى بلد في امريكا الجنوبية، وخايف انك تتعرض الى تعنت من موظف شركة الطيران وخايف ما تركبش الطيارة لاي اسباب ، اشتري تذكرتك على طيران خليجي او تركي مثلا، هيكون اغلى شوية، بس ما فيش خطورة عدم ركوبك الطيارة من الاساس وضياع الاجازة عليك وخسارة فلوس كتيرة.

15

 likes / 5 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec