27
Jul-2016

أسهل تأشيرة اتحاد اوروبي

 اسهل تاشيرة اوروبا

أحد أشهر الأسئلة على الاطلاق بخصوص التأشيرات “ايه اسهل سفارة أوروبية علشان اطلع التأشيرة؟”.

انا عندي اجابة للسؤال، بس للأسف في جزء حلو وجزء وحش:

الحلو، تأشيرة قبرص تعتبر من اسهل تأشيرات دول الاتحاد الوروبي

الوحش، انك ما تقدرش تروح بيها اي دولة اخرى غير قبرص. هي تأشيرة خاصة لقبرص فقط.

على الرغم من ان قبرص دولة من دول الاتحاد الاوروبي وعملتها الرسمية هي اليورو، الا ان تأشيرتها لها ظروف خاصة:

– اولا هي جزيرة في عرض البحر المتوسط ولا تشترك مع دول اوربية اخرى بأي حدود برية. لذلك لا يمكنك الانتقال من قبرص الى اي بلد اوروبي الا بعد النفاذ من احد مكاتب الجوازات الرسميةالقبرصية. علشان كدة مش متعسفين في اصدار التأشيرات زي باقي الاتحاد الاوروبي.

– ثانيا قبرص بلد قائمة على السياحة من دول غير دول الاتحاد الاوروبي، روسيا مثلا. علشان كدة متساهلين في اصدار التاشيرات لاصحاب الجنسيات الفقيرة الي زي حالتنا.

– ثالثا هي دولة غالية جدا في مصاريف المعيشة والاقامة وغير جاذبة للهجرة الغير شرعية مثل باقي دول الاتحاد الاوروبي الكبرى مثل المانيا وفرنسا مثلا.

ادخل على اللينك ده علشان تعرف اجرائات التقديم على تأشيرة قبرص بالتفصيل

علشان الاسباب دي هم من الدول الاوروبية الي احتمالات الحصول على تأشيرتها أعلى من باقى دول الاتحاد الاوروبي، لانك محبوس فيها وما تقدرش تروح اي بلداوروبية تانية منها. هي طبعا بلد جميلة، شواطئها والنايت لايف فيها جامدين جدا جدا. بس غالية حبتين، علشان جزيرة في البحر وكل حاجة بتيجي مستوردة بحرا. لو اخدتها وسافرت، اكيد هتحسن Travel History بتاع باسبورك.

طيب بالنسبة للدول الاوروبية الي تأشيرتها شنجن عادية وممكن بيها زيارة اكتر من بلد، ايه اسهل سفارة؟

للأسف, علميا، الاجابة على السؤال ده مستحيلة ومحدش يقدر يقولك ايه اسهل سفارة. علشان حد يكون عنده اجابة قاطعة للسؤال ده لازم يكون قدم على طلب تأشيرة في ال٢٨ دولة شنجن بنفس جواز السفر ونفس حساب البنك وكل المستندات  المقدمة تكون متطابقة، وبعدين يشوف اتقبل فين واترفض فين و مدة التأشيرة قد ايه. وطبعا ده شئ مستحيل.

اللينك ده مقالة كاملة عن خطوات تزبيط ورق التقديم لتاشيرة الشنجن

دول الشنجن كلها عندها نفس الاجرائات ونفس التخوفات من المتقدمين لطلب التأشيرة. بعضها بيعمل مقابلة شخصية وبعضها مش بيعمل مقابلة شخصية. بس ده مش معناه انها اسهل او اصعب. نفس الطلبات بتكون مطلوبة من جميع السفارات واحتمالات القبول او الرفض، من وجهة نظري، متساوية امام جميع السفارات. اتفرجوا على الفيديو ده علشان تعرفوا خطوات التقديم كلها بالتفاصيل المهمة.

لو حد تعرفه قدم ورق ضعيف للسفارة (حساب بنكي من غير فلوس كتير، جواب من الشغل بمرتب صغير، جواز سفر ابيض) و اخد تأشيرة الشنجن، يبقى امه دعياله انه عرف يقنع موظف السفارة انه مسافر سياحة وراجع مصر مرة أخرى. ممكن تجرب انت كمان في نفس السفارة لو حبيت. لكن انا شخصيا معرفش سفارة ايه اكثر او اقل تساهلا في اعطاء التأشيرات. لازم كمان وانت بتقدم تتجنب الاخطاء القاتلة للتأشيرات الي مكتوبين في المقالة دي.

انا ممكن اقترح عليكوا السفارات الكبيرة مثلا مثل المانيا و فرنسا و اسبانيا، لانهم بيدوا تأشيرات ذات مدد طويلة لزبائنهم المستديمين. يعني لو قدمت على فرنسا واخدتها اسبوعين، قدم تاني عليها بعد شهور وممكن تاخدها ٣ شهور، وبعدين ٦ شهور، وبعدين سنة او اكتر. بس لازم تثبت للسفارة انك كل مرة سافرت البلد بتاعتهم خلال فترة التأشيرة علشان يديك مدة اطول في التأشيرة الجديدة. اتفرجوا على الفيديو ده علشان تعرفوا خطوات الحصول على تأشيرة شنجن طويلة.

19

 likes / 4 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec