09
Nov-2016

ازاي تكسر التاشيرة بشكل قانوني

photostudio_1478657977752

لما ربنا يوفقك وتاخد تأشيرة الشنجن، في حاجتين مهمين اوي لازم تاخد بالك منهم في التاشيرة:

  • تاريخ صلاحية التاشيرة – تاريخ بداية ونهاية – لازم تدخل وتخرج خلالهم من منطقة الشنجن.

  • مدة الاقامة، Duration of Stay، عدد الايام المسموحة ليك للاقامة خلال فترة صلاحية التاشيرة.

لو اول مرة تاخد التاشيرة، عادة بتكون التاشيرة قصيرة وفترة السماح كذلك، ولكن بتزيد مع الوقت. شوف المقالة دي علشان تعرف ازاي ممكن تطلع تاشيرات طويلة لاوروبا.

لو خرجت من الشنجن بعد انتهاء صلاحيتها او اقمت في الشنجن ايام اكتر من المسموح بيه، يبقى انت كدة “كسرت التاشيرة”. ممكن تدفع غرامة في المطار وانت خارج وتتحط على قائمة سوداء Black List  وتتمنع ٥ سنين من دخول الاتحاد الاوروبي.

في ناس بتكسر التاشيرة علشان تدور على شغل، دراسة، عروسة … وناس تانية بتكسرها علشان تتفسح وقت اطول في اوروبا. اي كانت الحالة بتاعتك، لو فشلت في احلامك ما بعد كسرت التاشيرة، وتقرر ترجع بلدك مرة اخرى، هتتعرض لمشاكل عند تقديمك على التاشيرة مرة اخري واحتمال حصولك عليها قليلة جدا.

ازاي ممكن نكسر التاشيرة بشكل قانوني؟

يسمح القانون في دول الشنجن بمد صلاحية التاشيرة باجرائات بسيطة جدا وتكلفة قليلة جدا. ولكن مطلوب حد من اهل البلد المقيمين يروح معاك  مركز”شرطة الاجانب” ويقد طلب لمد فترة التاشيرة، مقابل ٣٠ يورو.

عملتها قبل كدة؟

انا شخصيا معملتهاش، لكن عرفت انها ممكن تتعمل من بعض الاصدقاء المصريين المقيمين في اوروبا. احد صديقات الصفحة كمان عملتها. راحت تزور خالها في امستردام وتاشيرتها كانت اقامة ٣٠ يوم فقط وتنتهي ٧ نوفمبر، وحبت تمدها علشان تدور على جامعة لاستكمال دراستها. خالها راح معاها شرطة الاجانب وعمل تمديد للتاشيرة بتاعتها لمدة ٥٤ يوم.

photostudio_1478645555826

تاشيرة الشنجن العادية المصدرة من السفارة في القاهرة

photostudio_1478645351055

 تمديد صلاحية الشنجن وايام الاقامة – شكلها شبه التاشيرة بالزبط

لازم يكون حد قريبي؟

مش شرط الي يقدم على طلب تمديد التاشيرة يكون قريبك. ممكن يكون واحد صاحبك او واحدة صاحبتك عايشين هناك، بدون اي روابط اسرية خالص.

هل ينفع الاقي شغل؟

للأسف مش هتقدر تشتغل اي شغل قانوني علشان مش معاك تصريح عمل. هتقدر تشتغل شغل غير قانوني فقط. علشان تلاقي شغل قانوني، لازم يكون معاك تاشيرة عمل وتكون مصدرة من “راعي sponsor” ،شركة في اوروبا.

هل ينفع تدرس وتقنن وجودك هناك؟

انا بصراحة معرفش هل ممكن اي جامعة او مدرسة تقبلك بدون تاشيرة دراسة خاصة. اعتقد ماينفعش. لو نفعت مع حد، يا ريت يعرفني.

هل ينفع اتجوز بيها؟

لا اعتقد انه ينفع تتجوز هناك، لان الاوراق المطلوبة هتكون كتيرة جدا وانت اكيد مش هتكون معاك الاوراق دي. هعمل مقالة قريب عن الجواز بالاجانب وازاي تعمله وازاي تقدر تاخد التاشيرة بيه، لان في ناس اتجوزت اجانب ومش عارفة تاخد التاشيرة.

نعملها امتى؟

انصحك لو عايز تمد فترة اقامتك في اوروبا لاي سبب في دماغك، مدها اول ما تروح علشان تعرف راسك من رجلك. انا معرفش هتاخد وقت قد ايه او ممكن تاخدها فترة قد ايه. معرفش كمان ممكن تجدد تاشيرة الزيارة كام مرة لعد اول مرة. قد تكون مسموحة مرة واحدة فقط او عدة مرات.

 

 

5

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec