08
Feb-2017

الزواج من اوروبية – مشاكل وحلول التاشيرة

في ظل الظروف الاقتصادية السيئة الي بيمر بيها الكثير من الشباب اليومين دول، اصبح حلم الهجرة، الى اوروبا وامريكا خاصة، يراود الكثير منهم باي طريقة، سواء بطريقة غير شرعية او غير شرعية. احد اشهر الطرق الشرعية للهجرة طبعا هى الزواج باجنبية. طبعا المترسخ في اذهان الكثير من الشباب ان الجواز من اي واحدة هيكون هو الطريق السحري والسهل للحصول على جنسية اوروبية او امريكية … لكن للأسف الموضوع محتاج شوية مجهود علشان ينجح.

جالي اسئلة كتيرة جدا بخصوص الموضوع …. ناس متجوزة من اوروبيات بقالها سنة واتنين واكتر، وبعضهم مخلفين كمان، ومش عارفة تاخد حتى تأشيرة الشنجن  …. واكتشفت من خلال مناقشات كتيرة معاهم ان في مشاكل في الموضوع ومحتاج الكثير من “التزبيط” علشان تنجح.

المقالة دي هتكلم اكتر عن اوروبا، لاني اتكلمت عن موضوع الجواز في امريكا قبل كده في المقالة دي.

خطوات الجواز في مصر

خليني اقولكم اولا على خطوات الجواز في مصر، والي بتحتاج بعض المستندات المهمة:

١) شهادة اثبات ديانة سماوية. حيث ان احنا بلد قوانينها الاجتماعية اسلامية، لازم الزوجة تكون صاحبة ديانة سماوية. مش شرط تكون مسلمة، ممكن مسيحية او يهودية. لازم يكون معاها مستند رسمي من بلدها يثبت انها صاحبة دين سماوي، او تشهر اسلامها في الازهر رسميا وتاخد شهادة بذلك.

٢) شهادة عدم ممناعة من سفارة بلدها. ودي تعتبر زي شهادة اثبات حالة اجتماعية انها غير متزوجة، مطلقة، او ارملة. لازم تثبت انها مش على ذمة زوج تاني في بلدها يعني. لو مطلقة، لازم يكون معاها حكم محكمة موثق، نهائي وقابل للتنفيذ.

٣) مستنداتها الرسمية الاعتيادية (شهادة ميلاد وما الى ذلك من مستندات رسمية للزواج)

٤) يتم توثيق جميع الاوراق في بلادها من السفارة المصرية وبعدين توثق من وزارة الخارجية المصرية.

٥) الزوج بيعمل اجرائات الزواج الرسمية من مكتب جواز الاجاب في وزارة العدل (في لاظغولي غالبا)

٦) توثيق عقد الجواز في مكتب الشهر العقاري في القاهرة (مكتب الاسعاف في وسط البلد)

٧) ترجمة عقد الجواز ترجمة معتمدة للسفارة (انجليزي او لغة بلدها)

٨) توثيق عقد الجواز في وزارة الخارجية المصرية

٩) توثيق عقد الجواز في سفارة بلدها

١٠) كل الي فات ده تعمل منه نسختين، واحدة ليها علشان توثقها في بلدها وواحدة معاك علشان اجرائات التقديم على التاشيرة

لكن هل معنى كدة انك هتاخد التاشيرة بكل سهولة …. للأسف لأ 🙁

خطوات التقديم على التأشيرة

للأسف ناس فاكرة معنى انها اتجوزت من اوروبية، اول ما هتروح السفارة هتلاقيها فاتحة ابوابها بالاحضان ومنتظرة العريس علشان تديله الجنسية علي طول. للأسف الموضوع  محتاج تقديم بعض الاوراق المختلفة شوية:

1)  بتقدم على تاشيرة زيارة 3 شهور بغرض المعيشة مع الزوجة، مش تاشيرة 5 سنين مثلا. واحدة واحدة. لما توصل بلدها تعمل اقامة مؤقتة لمدة سنتين. بلاش استعجال.

2) عقد الجواز الموثق من سفارة الزوجة

3) صور من صفحات جواز السفر بتاعها عليها اختام زيارتها ليك في مصر، لاثبات انكم اتقابلتوا فعلا قبل كدة وان ورق الجواز مش وهمي.

4) اثبات مكان اقامة الزوجة في بلد الزيارة. عقد شقة ايجار او تمليك باسم الزوجة.

5) بعض البلاد بتطلب شهادة فيش وتشبيه موقثة للزوج.

6) بعض السفارات (المانيا وفرنسا اعتقد) عنها طلب تاشيرة اسمه “لم شمل” FAMILY REUNION

7) تذكرة طيران بمواعيد السفر و تأمين صحي لفترة الزيارة

8) ممكن عدم تقديم كشف حساب بنكي او حجز فندق، ولكن يفضل تقديم جواب من جهة العمل علشان تثبت انك راجل بتشتغل ومش عاطل. هم عارفين انك رايح ومش راجع، بس عايزين يشوفوا مين الشخص الي مسافر بلدهم ده شغال ايه.

9) بعض السفارات ذات اللغات العالمية المعروفة (فرنسا والمانيا) بتشترط اجادة المستوى الاول من اللغة بتاعتها وشهادة معتمدة لاثبات ذلك (من معهد جوتة للغة الالمانية مثلا). اللغات الشرق اوروبية مثلا لا تشترط الشرط ده علشان عارفين ان مفيش مراكز لتعليم اللغة البولندية او المجرية مثلا في مصر.

10) بعض السفارات بتدي اعفاء لمصاريف التاشيرة في حالة لم شمل الزوج والزوجة.

 مقابلة السفارة

ده بيكون الجزء الاصعب في الموضوع، لان من خلال المقابلة بيحاولوا يتعرفوا على مدى صدق العلاقة الي بينكم. هل هي علاقة جادة فعلا ولا صفقة مالية بينكم علشان تاخد تاشيرة وهي تاخد منك فلوس مقابل مساعدتك.

مقابلة للزوج والزوجة معا

لو هي موجودة في مصر معاك، بتروحوا تعملوا مقابلة السفارة مع بعض. لكن كل واحد بيكون لوحده. بتدخل هي الاول وبعدين انت تدخل بعدها. لو هي في بلدها، انتوا الاتنين بتعملوا مقابلة في نفس الوقت، انت في السفارة وهي في شرطة الاجانب في بلدها او في مكان السفارة بتبلغها بيه. وبتم المقابلة لكم انتوا الاتنين في نفس الوقت. ليه بقى كل الاجرائات دي كلها. علشان بيتم عمل استجواب زي تحقيقات النيابة كدة ليكم انتوا الاتنين علشان يتأكدوا من تطابق الاجابات بتاعتكم.

اسئلة المقابلة رخمة جدا

الاسئلة بتكون اسئلة دقيقة وحساسة جدا احيانا. دي امثلة من ناس عملت الموضوع قبل كدة: اتقابلتوا فين؟ بقالكوا قد ايه مع بعض؟ بتحب تاكل ايه اكتر؟ بتحب الشاي ولا القهوة؟ عملوا الفرح فين؟ مين المعازيم الي حضروا الفرح؟ اسماء اخواتها واهلها ايه؟ اسماء ولادها ايه لو في؟ تكلفة الفرح كانت كام؟ شغلها ايه؟ شقتها فين؟ كام اوضة؟ سافرت فين قبل كدة؟ قدمت خاتم جواز؟ سعره كام؟ هوايتها ايه؟ الوانها المفضلة؟ اهلك شافوا مراتك وموافقين؟ كام مرة زارتك؟ بتعرف تسوق وعندها عربية؟ ماركتها ايه ولونها ايه؟ بتشرب سجاير ونوعها ايه؟ هتجيبوا عيال؟ هتسموهم ايه؟ تعليمها ايه؟ هتعمل ايه لما تروح بلدها؟ هتتعلم لغة بلدها؟ مين الي بيصرف على البيت؟ عندها املاك ايه؟ حساب في البنك؟ فيه كام؟ بتشرب كحول؟ كانت متجوزة قبلك؟ قعدت كام يوم لما زارتك؟ بتقعد معاك في البيت ولا بتقعد في فندق؟ الحياة الزوجية بينكم طبيعية؟ هل ممكن يحصل طلاق بينكم؟ لو مخدتش الاقامة لو روحت هناك، هترج بلدك؟ اتعرفت على صحابها واهلها؟

كل الاسئلة دي بتتسئل للطرفين وبيتم عمل مقارنة دقيقة لكل اجابة، علشان يتأكدوا ان الاجابات بتاعتكم متطابقة. كل ده لاثبات جدية العلاقة بينكم، وانك مش واخدها علشان تكون كوبري للهرب من بلدك الى بلادهم. علشان للاسف ناس كتير عملت كدة زمان، وأول ما وصلوا سابوا زوجاتهم وهربوا يعملوا الي هم عايزينه. لو كانت الاجابات مختلفة، بيتك رفض التاشيرة طبعا. حاولوا انكم تتعرفوا على بعض بشكل دقيق جدا علشان الاجابات تكون متطابقة.

الجواز من واحدة كبيرة “جدا” في السن

طبعا اهم ملاحظة في موضوع الجواز من اجنبية هي تقديم تنازلات كبيرة جدا علشان تلاقي واحدة توافق تتجوزك وتجيبك بلدها تعيش معاها. يعني انا لا معايا تعليم عدل ولا وظيفة عدلة ولا ليا اي مستقبل، ايه الي ممكن يخليني عريس جذاب لاي واحدة اجنبية؟؟ اني مصري مثلا وايجبشن هيبوسني وكدة؟؟ انسى!! بنات اوروبا ولاد ناس والله ولو هيتجوزوا واحد من برة بلادهم لازم يكون متعلم وبيشتغل وعده مستقبل وكدة. البديل الاسهل الي الشباب بيعمله هو الجواز من اجنبية كبير في السن ب١٠ او ٢٠ سنة كمان، علشان ياخدها كوبري يوصل اوروبا ويخلع.

طبعا السفارات تنبهت للموضوع ده واصبحت ترفض تأشيرات للمتزوجين الي فرق السن مبالغ فيه. يعني لو ١٠ سنين او اكتر، ممكن جدا السفارة تتعنت معاك وترفض. علشان كده لازم في المقابلة تقنعهم ان فرق السن ده مش هيكون مشكلة ابدا في علاقتكم وانكم هتكملوا حياتكم للابد مع بعض وكدة

مشكلة اللغة

المقابلة معاك ومعاها هتكون باللغة الانجليزية، علشان يطمنوا ان في مستوى تواصل مقبول منكم. يعني مش الانجليزي بتاعك وبتاعها ضايع وتقوله هنتكلم بجوجل translate … لازم يتأكدوا انكم بتعرفا تتفاهموا اصلا بالكلام. لو الانجليزي بتاعكم ضعيف ومقضينها بينكم مواقع ترجمة، لازم تحسنوا مستوى اللغة الانجليزية بتاعكم.

الاحساس بالاندماج

الغرض المهم من المقابلة هو تقييم قابليتك للاندماج في مجتمع الزوجة. لازم تكون عارف شوية كلام باللغة بتاعتها، حتى لو صعبة جدا. لازم تديله احساس انك جاد جدا في تعلم اللغة دلوقتي ولما تروح هناك. اول حاجة هتعملها هى تعلم اللغة في مراكز تعليم اللغة والاندماج في بلدها. انك مثلا ناوي تتعلم مهنة معينة لما تروح وتشتغلها علشان تكون مفيد للمجتمع هناك. اي وظيفة في اي بلد هتكون محتاجة منك اتقان للغة. يعني لو هتتجوز واحدة من الريف البولندي، مش هتلاقي شغل في بلدها غير لما يكون معاك لغة. لو رايح بلد سياحية عالمية، زي لندن ولا باريس ولا برلين، ممكن المشكلة دي تكون اقل صعوبة علشان في مجالات للعمل الخدمي مثلا في حاجات اصحابها بيتكلموا انجليزي او اصحاب عمل عرب بيتكلموا عربي.

زيارات مفاجأة

بعد ما تاخد التاشيرة وتسافر تعيش مع زوجتك في منزلها، بتروح تقدم على اقامة مؤقتة مدتها سنتين. استعد خلالهم لبعض الزيارات المفاجأة من شرطة الاجانب، للتأكد من انكم عايشين فعلا مع بعض، وان الحواز ده لم يكن زواج صوري على الروق بس للحصول على التاشيرة. لو لقوك نايم في الصالة حتى مش في اوضة نومها، ممكن تعرض نفسك لمشكلة.

بناخد الجنسية امتى وازاي؟

بعد اقامتك سنتين تلاتة مع زوجتك بدون مشاكل، بتروح تجدد الاقامة لمدة ٥ سنين اخرى، وبعد كدة بتقدم طلب للحصول على الجنسية. بيتعملك ساعتها اختبار اجادة لغة البلد علشان تقدر تحصل على الجنسية. لازم تكون بتتكلم لغة البلد كويس جدا. بعض البلاد بتعمل اختبار تاريخ كمان (امريكا مثلا).

اعمل ايه لو التأشيرة اترفضت؟

ارفع قضية على السفارة

 

في ناس قدمت كتير وعملت كل الي قولت عليه ده، وبرضو اترفضت … نعمل ايه في الحالة دي؟ بيتم تقديم تظلم في السفارة كل مرة بيتم فيهاالرفض واخر الحلول الاكيدة هو رفع قضية في المحاكم. بتقوم الزوجة للجوء الى القضاء علشان تجيب جوزها يعيش معاها. بترفع قضية في وزارة العدل (غالبا) على سفارة بلدها في مصر وتقول انهم متعنتين في اعطاء زوجها التأشيرة بدون اسباب ومانعين انهم يكملوا حياتهم الزوجية مع بعض بشكل طبيعي مع بعض. لو الزوجة عرفت تقنع القاضي ان الزواج سليم وصحيح فعلا، بيتم الحكم لصالحها والزام السفارة بمصر باصدار التاشيرة.

ازاي الاقي عروسة طيب؟؟

طبعا انا مش كاتب المقالة علشان اعلمك “ازاي تلاقي عروسة اوروبية” او علشان اشجع ان الناس تعمله كدة. انا بتكلم عن المشاكل الي بتحصل لناس كتير في الموضوع. الشؤال العجيب ده للأسف جالي كتير على اساس اني خاطبة مثلا 🙂  … الانترنت عندكم بقى يا جماعة، dating sites بالهبل دلوقتي. ربنا معاكم ان شاء الله

الي عنده اي تجارب او ملاحظات يا ريت يقولهالي علشان اصلحها او اضيفها. كل دي من مناقشات مع ناس عملت التجارب دي. 

17

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec