09
Nov-2016

تحديث قوانين دخول الشنجن

photostudio_1478644954400

الاعتراف بالخطأ هي شيمة الجدعان، وانا عايز اعترف بخطأ عملته في مقالة سابقة وعايز اعمل تحديث يتماشى مع القوانين المطبقة بشدة بقالها ٦ شهور.

تعريف الشنجن

المفروض ان تاشيرة الشنجن هي تأشيرة لدخول دول الاتحاد الاوروبي كلها، وتسمح لك بحرية التنقل بين دولها جميعا. انا شخصيا خلال ال١٠ سنين الي فاتوا سافرت بلاد اوروبية كتير بتأشيرات مختلفة …. شنجن من البرتغال روحت بيها اسبانيا، شنجن من التشيك روحت بيها فرنسا …. الامثلة كتير….. يعني لما كتبت كدة، ده كان من واقع خبرتي الشخصية المباشرة.

قوانين جديدة ولا موجودة؟

قوانين الاتحاد الاوروبي تسمح بالدخول من اي من منافذها بتأشيرة الشنجن، وده الي بيحصل مع ملايين المسافرين. لكن في نفس الوقت تمنح ضابط الجوازات في مطار الوصول الحق في منعك من الدخول الى اراضي دولته اذا لم تحمل تاشيرة شنجن مصدرة من سفارتها في بلدك (single entry) او اذا لم يكن اول استخدام للتأشيرة Multiple enrty في بلد الاصدار.

يعني ايه الكلاكيع دي؟

يعني لو مطلع تاشيرة شنجن، single او multi من سفارة هولاندا وقررت تسافر المانيا، من حق ضابط الجوازات انه يمنعك من الدخول، يلغي تأشيرتك، يرحلك على بلدك في اقرب طيارة على حسابك الشخصي.

(لكن لو كنت استخدمت التاشيرة multi قبل كدة ودخلت هولاندا مرة، وسافرت تاني من مصر الى المانيا، ساعتها مش هيكون في مشكلة.)

 لكن تطبيق القانون يرجع الى وجهة النظر الشخصية لضابط الجوازات، من سلطته ايقافك او ادخالك. لانك ممكن تقنعه انك مسافر هولاندا مثلا بعد كده، ويوافق يدخلك، او يشك في امرك ويرفض دخولك.

حادثة حقيقة

الحادثة دي حصلت مع “أحمد”،  احد اصدقاء الصفحة، من يومين في مطار فرانكفورت في المانيا. احمد طلع تاشيرة شنجن من هولاندا علشان عنده شغل في المانيا ومعرفش يجيب مواعيد بدري. مكتب شركة السياحة في القاهرة اكد ليه انه مفيش مشكلة انه يسافر المانيا وهو معاه تأشيرة هولاندا. لكن للاسف اترفض دخوله ورجع مصر. كتب لي تجربته الشخصية والي حصل معاه لما احتجزوه في المطار ليلة ويوم لحد ميعاد طيارة رجوعه على مصر:

  • تم عمل تحقيق في مكاتب ضباط الجوازات لمدة ٥ ساعات.

  • تم عمل محضر رسمي بالواقعة واطلعوا على جميع الاوراق (تذاكر الطيران، حجوزات الفندق، دعوة من شركة المانية)

  • اتصلوا بالشركة المصدرة للدعوة للتأكد من صحتها واتصلوا بالفندق للتأكد من وجود حجز فعلي.

  • اتصلوا بالسفارة الهولندية بالقاهرة للتأكد من اصدارها التاشيرة ومن المستندات المقدمة لها.

  •  تم توفير مترجم عربي-الماني حتى يتمكن احمد من شرح وجهة نظرة لضابط الجوازات.

  • تذكرة  الذهاب والعودة القاهرة-فرانكفورت ولا يوجد ذكر لهولاندا في برنامج الرحلة على الاطلاق. حجز الفندق كان في المانيا فقط.

  • لان تأشيرته Multi, حاول احمد اقناعهم انه مسافر هولاندا كمان اسبوعين. رفض.

  • طلب منهم الذهاب من فرانكفورت الى امستردام، بدلا من الترحيل الى القاهرة. رفض.

  • طلب المحقق من احمد في اخر الجلسة دفع غرامة ٦٠٠ يورو، لكن تم كتابة مذكرة لتوضيح عدم التعمد في ما حدث، وتم تخفيضها الى ١٢٠ يورو غرامة.

  • دفع احمد  ايضا٢٣٠ يورو مصاريف تغيير تذكرة العودة الى القاهرة لاقرب رحلة.

  • حاول ضابط الجوازات الاقل رتبة اقناع رئيسه بالسماح لاحمد بالمرور، ولكن دون جدى. رفض.

  • الحادثة غير ناتجة عن اي عنصرية على الاطلاق، علشان كان في ٤ اشخاص محتجزين معاه لنفس السبب، ولدين من البانيا والجزائر وبنتين من روسيا.

  • البنتين من روسيا سافروا المانيا قبل كدة ١٠ مرات، ولكن تاشيرتهم طالعة من فرنسا، وتم رفض دخولهم الاراضي الالمانية.

    %d8%aa%d8%a7%d8%b4%d9%8a%d8%b1%d8%a9-%d9%85%d9%84%d8%ba%d9%8a%d8%a9التاشيرة بعد الالغاء في مطار المانيا

الخطأ الكبير

المشكلة الكبيرة في الموضوع هي عدم وجود نية على الاطلاق للذهاب الى هولاندا. طيب ليه ماقالش انه رايح هولاندا من فرانكفورت وخلاص؟

– لو كان احمد قال انه رايح هولاندا بعد يومين مثلا، محدش كان هيقتنع طبعا لان حجز الفندق في فرانكفورت لمدة اسبوع وتذكرة رجوعه الى القاهرة كانت بعد اسبوع.

– بالاضافة الى ذلك، كان هيكون مطلوب من احمد اثبات نية الذهاب الى هولاندا بتذاكر طيران او اتوبيس او قطر، واثبات محل اقامة في هولاندا.

طيب انا مسافر ترانزيت، في مشكلة؟

لو معاك تاشيرة من هولاندا وكنت مسافر هولاندا عن طريق ترانزيت في المانيا، كنت هتدخل عادي جدا لان تذكرتك موجودة بالفعل وهتركب على طول دون المكوث في المانيا. مفيش مشكلة لركاب الترانزيت.

طيب لو انا عامل رحلة اوروبية وهبدأ من بلد غير المصدرة للتاشيرة؟

لو معاك تاشيرة هولاندا وعايز تعمل جولة اوروبية تبدأ في المانيا مثلا، وبعدين بلجيكا وبعدين تختمها في هولاندا، هل هيكون في مشكلة؟ مش هيكون في مشكلة لانك ممكن ببساطة تثبت لضابط الجوازات خط سيرك بحجوزات الطيران الداخلي، او الاتوبيس، تذكرة عودة للقاهرة من هولاندا، او حجوزات الاقامة في هولاندا.

معايا تأشيرة مدتها سنة من هولاندا وسافرتها مرة قبل كدة، هل لازم ادخل اوروبا من هناك كل مرة؟

لا طبعا. طالما عملت دخول اول first entry من بلد المصدرة مرة قبل كدة، يبقى من حقك تدخل من اي بلد تانية بعد كدة.

المانيا حالة خاصة؟

معنديش فكرة بصراحة هل المانيا صارمة في تطبيق القوانين ولا جميع دول الشنجن اصبحت صارمة في تطبيق القوانين. لو حد حصل معاه نفس الموقف يبعتلي علشان نزود التجربة بتاعته.

لو حد حصل معاه اي مشاكل تخالف الي انا قولته يا جماعة، يا ريت يكتب لي تعليق او يبعتلي رسالة وانا هضيف التجارب بتاعتكم كلها في  المقالة.

4

 likes / 2 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec