17
Oct-2016

تأشيرة الترانزيت، امتى وازاي؟

photostudio_1476732238512

علشان السفر الترانزيت احيانا كتير بيكون ارخص من السفر المباشر واحيانا اكتر بيوصلنا بلاد مش بيروحها الطيران المباشر, كتير مننا بيستخدمه في السفر. انا كنت اتكلمت عن الفرق بين الطيران المباشر والترانزيت قبل كدة … وبعدين عملت مقالة تانية اهم بعنوان ١٠ خطوات لرحلة ترانزيت ناجحة.  …. انصحك تقرأ المقالتين دول قبل ما تكمل المقالة دي.

انا دايما بحاول اني الاقي تذاكر ترانزيت يكون وقت الانتظار بتاعها قليل علشان القعدة في المطار بتكون متعبة ومملة احيانا كتيرة. بس لازم مايكونش قليل اوي (ساعة الى ساعتين)، علشان الشنط تلحق الطيارة التانية بتاعتي. طيب لو وقت الانتظار طويل اوي، هل ينفع اطلع برة المطار اتفرج على المدينة الي انا عامل فيها ترانزيت؟ هو ده بيختلف طبعا من شركة لشركة، ومن بلد لبلد.

خلينا نقسم الموضوع على حسب شركات الطيران وفي حدود معرفتي بكل واحدة. هكون كمان محتاج رأي كل حد فيكم وخبرته وتجربته، علشان نستفيد كلنا.

١- شركات الطيران الأوروبية الشنجن

– معاك تأشيرة الشنجن؟

لو معاك تاشيرة الشنجن يبقى جميل جدا، تقدر تعمل ترانزيت في اي بلد شنجن انت مسافر عن طريقها.

لو مثلا مسافر من القاهرة الى باريس على الخطوط اليونانية، وعندك ترانزيت في العاصمة اليونانية أثينا. يبقى هتوصل اثينا، وطبعا هتختم جواز السفر في مطار اثينا، مطار دخول منطقة الشنجن. هتتنظر في اثينا طيارتك المتجهة الى باريس. بكل بساطة تقدر تاخد بعضك وتطلع من المطار تتفرج على اثينا في ساعات الانتظار بتاعتك. لو كانت ١٠ ساعات مثلا، يبقى تخرج وترجع في نفس اليوم، لكن لو ٢٠ ساعة مثلا، يبقى تحجز في مكان وتقضي الليلة بتاعتك، وترجع تاني يوم على ميعاد طيارتك.

وانا راجع من امريكا في شهر يوليو ٢٠١٦، كنت راجع على الخطوط الالمانية لوفتهانزا، وكان عندي ترانزيت ٨ ساعات في مدينة ميونخ. كان معايا تاشيرة شنجن. قررت اخرج اقضي ٦ ساعات اتفرج عليها وارجع قبل الطيارة بساعتين. الباسبور اتختم دخول وخروج في نفس اليوم.

      طيب وشنط السفر؟

– اولا، شنطة سفرك الكبيرة الي دخلتها الطيارة وانت في القاهرة، هتستلمها في وجهتك النهائية، باريس مش مدينة الترانزيت اثينا.

– ثانيا، لو معاك هاند باج ومش عايز طبعا تلف البلد وانت شايلها على قلبك، يبقى تدور على خدمة lockers هتلاقيها موجودة في كل المطارات الاوروبية. هتلاقي خزنة متعددة الاحجام لجميع مقاسات الشنط. هتدفع ٥ يورو مثلا في اليوم او اقل، تحط شنطك فيها وتاخدها اخر اليوم او تاني يوم وانت ماشي. لو هتبات ليلة في مدينة الترانزيت، يبقى اكيد تاخد معاك “الهاند باج” وتحط فيها حاجتك الشخصية لمدة يوم واحد.

– مش معاك تأشيرة شنجن؟

طيب لو مسافر دولة غير شنجن مثلا كرواتيا، اوكرانيا، بلغاريا، ولكن عن طريق شركة طيران شنجن، اليونانية مثلا برضو، هل لازم اعمل تاشيرة ترانزيت علشان اقدر اعمل ترانزيت في اثينا؟ هل ممكن اخرج من المطار اتفرج على اثينا اثناء ساعات الترانزيت؟

   اولا، انت مش محتاج تعمل اي تاشيرة ترانزيت علشان تعمل ترانزيت في اي دولة اوروبية شنجن

   ثانيا، مفيش حاجة اصلا اسمها تاشيرة ترانزيت في دول الشنجن.

لو الترانزيت بتاعك ١٠ ولا ٢٠ ساعة، ومش معاك تاشيرة شنجن، يبقى لازم تقضي ساعات الترانزيت كلها في المطار. تقرا كتاب، تدور على wifi وتقضيها عليه، تتفرج على فيلم، تنام، في حاجات كتيرة اوي تتعمل.

ثالثا، لو اول مرة تسافر في حياتك، وقررت تسافر الى اي دولة من خلال ترانزيت في دولة من دول الشنجن (رايح روسيا مثلا، جورجيا، تركيا، البرازيل، الارجنتين)، قد تواجهك مشكلة في السفر من مصر اصلا. اقرأ المقالة دي علشان تعرف اكتر لان الموضوع طويل.  

٢- شركات الطيران البريطانية – لندن

يتطلب وجود تأشيرة ترانزيت لعمل ترانزيت في مطاراتها، لكن يستثنى من ذلك الركاب الي معاهم تاشيرة امريكا، كندا، استراليا، نيوزيلاندة. معلومات اكتر على اللينك ده.

٣- الطيران الكندي

تحتاج كندا الحصول على تاشيرة ترانزيت قبل عمل ترانزيت في اي من مطارتها.

٤- شركات الطيران الخليجية

خطوط الطيران الخليجية بتقدم احسن اسعار لدول اسيا وبتغطي بلاد ومدن كتيرة فيها. لا تحتاج تاشيرة ترانزيت للسفر الترانزيت عن طريق اي دولة خليجية، طالما لن تغادر المطار. بعض شركات الطيران ممكن تديك تاشيرة ترانزيت علشان تزور البلد بتاعتها، احيانا مجانا واحيانا بفلوس.

انا تجربتي الوحيدة كانت مع طيران العمانية، اقروا تجربتي معاها في المقالة دي ، لانها كانت تجربة حلوة ووحشة في نفس الوقت.

لو حد عنده تجربة مع الاماراتية، الاتحاد، القطرية. ياريت اي حد مسافر عليهم قريب وعنده ترانزيت عليهم يبلغنا تجربته كانت عاملة ازاي وتكلفتها كانت قد ايه.

خدمات ركاب الترانزيت

بعض شركات الطيران بتوفر خدمات لركاب الترانزيت الساعات الطويلة. بعض الشركات ممكن توفر اقامة مجانية في فندق داخل المطار. شركات اخرى بتوفر وجبات مجانية من مطاعم المطارات (طبقا لكلام احد اصدقاء الصفحة كان مسافر على الخطوط التركية). انا شخصيا معنديش خبرة في موضوع خدمات ركاب الترانزيت علشان مش عملتها كتير، او مكنتش اهتم اعرفها اوي زمان. يا ريت تكتبوا تجاربكم في الموضوع ده في التعليقات علشان اعمل تحديث للمقالة بعدين.

تحديث من اصدقاء الصفحة

   – الاماراتية

ياسر أحمد: أنا قبل كده كنت مسافر تايلاند ترانزيت دبي ١٠ ساعات ادوني تأشيرة ٩٦ ساعه في المطار و اوتيل مع التكيت ادوني فاوتشر اخد بيه الفيزا و أسلمه لواحد في المطار خدني بباص للفندق و بعد كده الباص جه خدني قبل الرحلة بساعتين.

  – القطرية

محمد رفعت: القطرية بتديك اوضة في اوتيل وعربية بتوصلك للاوتيل من المطار وترجعك تاني لو الترانزيت اكتر من ٨ ساعات . انا كنت راجع من شيكاجو من شهر وكان عندي ترانزيت حوالي ٢٠ ساعة جابولي اوضة في فندق و باص وداني ورجعني وحساب في الفندق ١٥٠ ريال قطري تستخدمهم اكل في الفندق

  – القطرية/الخليجية/السنغافورية

وائل الشازلي: نا سافرت حوالي عشرين مره لمعظم دول العالم وكان اسوء ترانزيت بتاع القطريه … مطار الدوحه ممل ومفيش خدمات مهما كانت مده الترانزيت … عكس معظم دول العالم في سنغافوره مثلا لو الترانزيت اكتر من 6 ساعات بتطلع جوله علي حساب الطيران لرؤيه معالم سنغافوره ووجبه طعام او اتنين علي اعلي مستوى.. وحتى علي اسوء طيران ركبته بحياتى ( طيران الخليج ) كانت الترانزيت فول اوبشن .. فندق المريديان ووجبات اكتر من خمس نجوم .

الخلاصة

– لا يوجد تاشيرة ترانزيت للاتحاد الاوروبي – يوجد تاشيرة الشنجن العادية

– بامكانك الحصول على تاشيرة ترانزيت في بعض البلاد العربية لقضاء ساعات الترانزيت. تواصل مع شركة الطيران  لمعرفة التفاصيل

– بامكانك الحصول على بعض الخدمات في المطار في حالة الترانزيت الطويل (اقامة مجانية/وجبات). استفسر من شركة الطيران.

– تابع التعليقات على المقالة علشان مشاركات الاصدقاء مهمة جدا بهذا الصدد

بس للأسف بعض سفريات الترانزيت من خلال الطيران الاوروبي غير مسموح بيها – انتظروا المقالة القادمة بخصوص الموضوع الشائك ده. 

5

 likes / 16 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec