11
Jul-2016

٣ أخطاء قاتلة في تأشيرات اوروبا وامريكا

photostudio_1468251156667

من اكتر الحاجات المحبطة في السفر هي صعوبة استخراج التأشيرات للبلاد الي نفسنا نسافرها، خصوصا الدول الاوروبية وامريكا. للاسف الكتير مننا بيعمل اخطاء قاتلة قد تتسبب في رفض طلب الحصول على التاشيرة. من خبرتي في استخراج عشرات التاشيرات والاسئلة الكتيرة الي بتيجي للصفحة، خليني اقولكم على ثالوث الاخطاء الشهير الي ممكن يكون سبب للرفض:

١- جواب دعوة من مستضيف

هو ده الي بيقولوا عليه السم في العسل!! كتير فاكرين اني لما اروح اقولهم في السفارة اني رايح ازور خالتي في امريكا ولا عمي في هولندا، السفارة هتطمن اني هلاقي حد يتكفل بمصاريف اقامتي وانا هناك.

العكس كومبليتلي يا منى!! السفارة غالبا هتكون شاكة انك هتروح تبلط هناك في الخط زي همام في امستردام كدة. هتكسر تاشيرة وتقعد عن خالك وتشتغل شغل غير شرعي والقصص دي. ارجوك ارجوك ارجوك، لما تقدم على التاشيرة، قدم على اساس انك سايح فقط. احجز فندق واعمل برنامج للرحلة بتاعتك، وما تجبش سيرة حد هناك.

– طيب لو حضرتك قدمت بدعوة قبل كدة واترفضت، تعمل ايه في التقديم مرة اخرى بعد ٦ او ٣  شهور على الاقل؟

تقدم على انك سايح المرة دي من غير جواب دعوة. رايح نيويورك وميامي اتفسح اسبوعين …. “طيب مش هيكون الراجل في المقابلة عارف اني قدمت قبل كدة واترفضت علشان قولت ان خالتك عايشة في شيكاغو مثلا؟”

ممكن يكون عارف وممكن يكون مش عارف … “طيب والعمل؟”

لو سألك تعرف حد هناك، قوله لا معرفش حد … ممكن تعدي وخلاص.

لو اتفقست وطلع عارف….  واتزنقت وقالك انت مش خالتك عايشة في شيكاغو؟ لا تكذب!!  قوله اه بس انا مش رايح شيكاغو، انا رايح اتفسح في نيويورك وميامي علشان احلى طبعا. مفيش مانع من شوية استهبال.

انا مرة زمان كان عندي شغل في فرنسا، ومعايا دعوة زيارة عمل من اكبر بنوك فرنسا، واترفضت. الدعوة لا تضمن التأشيرة على الاطلاق.

ولكن, لكل قاعدة شواذها, بعض الناس نجحت في الحصول على تأشيرة وهي معاها دعوة, ولكن قد يكون موقفهم الوظيفي والمادي كويس جدا. انا بتكلم هنا بلغة الاحتمالات. احتالات نجاحك اعلى بدون جواب دعوة. 

٢- كشف حساب من غير حركة او رصيد

احد اهم طلبات السفارة هي كشف حساب بنكي الخاص بالمرتب الشهري بتاعك، علشان ده بيثبت انك موظف وعندك دخل شهري ثابت …. “طيب افرض انا عليا قروض وجمعيات وبخلص مرتبي كل شهر؟ شكل كشف الحساب هيكون وحش وانا مقدمه فاضي كده؟ طيب استلف ٢٠ ولا ٣٠ الف من امي ولا ابويا ولا اقبض الجمعية بدري واحط الفلوس قبل ما اطبع كشف الحساب؟” ….   غلط!!!

لو سمحت استلف المبلغ ده او اقبض الجمعية دي قبل ما تطبع كشف الحساب ب ٦ شهور، علشان لما تطبع كشف الحساب، يبان ان فيه فائض شهري من الفلوس هتصرفه على السفرية دي.

ممكن كمان تقدم كشف حساب كروت الائتمان بتاعتك لو فيها حركة شهرية كتير. بتكون دليل على انك مقتدر ماديا والفلوس معاك رايحة جاية.

طبعا ممكن تقدم حسابات توفير في البديد او بنوك تانية. ودائع بنكية في اي بنك آخر.

طيب لو مرتبك الشهري قليل، بس عندك فلوس في حسابات شخصية تانية، تعمل ايه؟ ….. ممكن تعمل ايداعات شهرية منتظمة في نفس تاريخ مرتبك. يعني مثلا المرتب ٢٠٠٠ جنية في الشهر، اعمل ايداع ب٥٠٠٠ مثلا في نفس تاريخ نزول مرتبك. لما تعمل المقابلة وحد سألك في السفارة، قول ان مرتبك مثلا جزء ثابت وجزء متغير بينزل منفصل كل شهر. كدة يبان ان في دخل شهري بمبلغ ٧٠٠٠ جنية مثلا. برضو الكلام ده تعمله لمدة ٦ شهور. اهم حاجة ان الحساب يكون فيه حركة سحب كمان علشان يكون شكله حلو.

لو انت طالب او عاطل، قدم كشف حساب والدك ووالدتك. حسابات جارية، حسابات توفير، ودائع بنكية، ان شاء الله حتى شهادات قناة السويس. اي مستندات بتثبت بيها انك مقتدر ماديا.

الحلول المقترحة لتجميل شكل كشف الحساب، لتحسين فرص الحصل على التأشيرة.

٣- التقديم على السفر بجواز سفر ابيض

انا عارف طبعا ان حلم اي حد عايز يسافر برة هو اوروبا وامريكا … عايزين نشوف بلاد نضيفة كدة ومحترمة!! اول مرة اسافر وحوشت فلوس وعايز اشوف الوجة الحسن بقى!! الحقيقة المؤلمة للأسف هى ان احتمالات الرفض بتكون اعلى بكتير لما تقدم على تاشيرة الشنجن او امريكا بجواز سفر ابيض يا ورد، من غير ولا سفرية قبل كدة. بيندي انطباعات مسبقة عند السفارة ان السفر ده عمره ما كان من اهتماماتك قبل كدة …  وانك رايح فرنسا ولا امريكا علشان ما ترجعش.

نصيحتي ليك انك تحاول تسافر سفرية واحدة حتى، ويكون فيها بلدين مع بعض مثلا. بلاد الله واسعة وحلوة كتير، ومن غير تأشيرات او تأشيراتها سهلة. ممكن تعمل تركيا وجورجيا في رحلة واحدة مثلا. ماليزيا واندونسيا او تايلاند او فيتنام. كلها دول جنب بعضها وممكن تسافرهم في رحلة واحدة. شوف الفيديو ده علشان تعرف ازاي تلاقي تذاكر سفر لاكتر من بلد مع بعض.

ممكن تجرب حركة تانية صايعة حبتين، بس هتخلي شكل الباسبور احلى. انك تقدم على تأشيرتين سهلين مثلا، وتاخدهم على الباسبور من غير ما تسافر. انا مرة اخدت تاشيرة المغرب والبرازيل، وحصل ظروف في كل رحلة وما سافرتش دي ولا دي. التاشيرات هيكون شكلها حلو على صفحات الباسبور الابيض. اينعم مش هيكون على التأشيرات اختام، ولكن شكل الباسبور هيكون الطف. لو حد في السفارة سألك، قوله كنت مسافر وحصل ظروف في الشغل او العيلة وما سافرتش.

٩٠٪ من دول العالم  الثالث الفقير اقتصاديا والغير جاذب للمهاجرين، بيكون من غير تأشيرة اصلا، او التاشيرة بتاعتهم هتكون سهلة. قاعدة عامة كدة.  

يبقى سفريتين مع الاختام بتاعتهم، على تاشيرتين من غير اختام، يبقى الانطباع الاول عن الباسبور ايجابي، وساعتها نسب نجاحك فيفي الحصول على التاشيرة مرتفع.

لكل قاعدة شواذها برضو, بعض الناس باسبورها ابيض وبتنجح في الحصول على التاشيرة. قد يرجع ذلك لان ظروفهم الوظيفية او المادي قوية جدا. انا بتكلم هنا بلغة الاحتمالات، يعني لو باسبورك فيه  ،سفريات وتأشيرات،احتمالات نجاحك هتكون اعلى من لو كان باسبور فاضى  

الفيديو ده فيه شرح خطوات الحصول على تاشيرة اوروبا او امريكا،

والفيديو ده ازاي تطلع تاشيرة طويلة لاوروبا واشهر الاخطاء الخاصة بالموضوع ده.

اتفرجوا على باقي المقالات الخاصة بالتأشيرات على الموقع.

10

 likes / 56 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec