12
Aug-2016

أعمل ايه لو تأشيرة اوروبا اترفضت؟

20160812_143318

ناس كتير خايفة تقدم على تأشيرة الشنجن لاوروبا وتأشيرة آمريكا علشان مرعوبين من وجود ختم رفض على جواز السفر بتاعهم. الخبر السار يا جماعة الي عايز اقوله ليكم هو ان مفيش حاجة اسمها ختم رفض على جواز السفر.

أغلب السفارات الاوروبية لما تقدم فيها على تأشيرة الشنجن، بيتم ختم جواز السفر بختم بيقول انه تم استقبال جواز السفر في السفارة يوم كذا Received Stamp. وجنب الختم بيكون مكتوب رموز لدول الاتحاد الاوروبي -مثلا: اسبانيا S – المانيا D – البرتغال P – وهكذا. وبيتم عمل دائرة صغيرة على رمز السفارة الي بتقدم فيها جواز سفرك.

visa received stamp

في حالة اصدار التأشيرة بنجاح، يتم اصدار التأشيرة في نفس الصفحة الي تم ختمها بختم الاستقبال، ويختفي الختم تحتها. وفي حالة، لا قدر الله، تم رفض التأشيرة، لا يتم ختم الباسبور بختم رفض – Refused – Rejected – Declined.

هل دي نهاية الكون بالنسبة لمستقبلك في السفر لاوروبا؟ طبعا لا!

اول حاجة ممكن تعملها هي انك تعمل تظلم. تشوف جواب الرفض الي جاي مع جواز السفر، بيكون مكتوب فيها اسباب الرفض. وتبعت للسفارة مستندات تدعم موقفك المادي مثلا. كشف حساب والدك او شهادات استثمار. بتحاول تكتب جواب للسفارة تقنعهم انك مش ممكن تسيب البلد علشان وظيفتك، تعليمك، اهلك، فلوسك، الخ الخ.

للأسف أغلب سفارات الدول الصغيرة بتتجاهل الرد على التظلمات، بينما سفارات الدول الكبرى زي المانيا وفرنسا مثلا، بترد عليك، اما بالرفض مرة اخرى او بقبول التظلم واصدار التأشيرة.

تحديث: ناس كتير قدمت تظلمات واتقبلت بالفعل ونجحوا ياخدوا التاشيرة لان ورقهم كان فعلا كويس. انتظروا مقالة عن الموضوع ده بالتفصيل قريبا.

 لو حد عمل تظلم ونجح او فشل، يا ريت يعرفنا في كومنت ايه الي حصل معاه.

لا تصدر جواز سفر جديد – علشان هيعرفوا انك قدمت قبل كدة

طيب والعمل بعد كدة؟

من حقك انك تقدم مرة أخرى على تأشيرة الشنجن في نفس السفارة او سفارة اخرى بعد ٣ شهور. وممكن بكل تأكيد انك تأخدها من سفارة تانية بعد ما تكون زبطت ورقك احسن من المرة الاولى. كشف حساب احسن. سافرت سفريتين غير الشنجن. وظيفة بمرتب احسن. حاجات كتير ممكن تكون حصلت ودعمت موقفك قدام السفارة علشان تقتنع انك مسافر تتفسح سياحة فقط ولا نية عندك انك تكسر تأشيرة وما ترجعش. لو اترفضت وقدمت تاني، عرفنا في كومنت برضو ايه الي حصل معاك علشان الناس الي خايفة تطمن وتعرف ان في امل.

أحب اقول لكم اني اترفضت مرة في سفارة المانيا ومرة في سفارة فرنسا، وبعد كدة الظروف اتحسنت الحمدلله واتعلمت من اخطائي وقدرت اخدها بعد كدة اكتر من ١٥ مرة. الموضوع مش مأساة كبرى والله. في ناس بتحسسني في رسائلها ان رفض التأشيرة ده حاجة زي فقد العذرية مثلا، طامة كبرى.

الخبر الحلو بقى ان بعض السفارات الاوروبية، تحديدا فرنسا (وسمعت كمان هولندا واليونان) مش بتختم جواز السفر اصلا بختم Received ده من الاساس. يعني الياسبور هيدخل ويخرج من غير اي اختام عليه. وكذلك سفارة امريكا، لو اترفضت، بتاخد جواز السفر معاك وانت ماشي بعد المقابلة الشخصية في السفارة من غير اي اختام من اي نوع. لو حد قدم في سفارة واترفض وجواز سفره خرج من غير اختام، يا ريت يعرفنا برضو في كومنت علشان نتشارك المعلومات كلنا.

في ناس ربنا بيوفقها في المقابلة الشخصية وبتنجح في الحصول على التأشيرة وجواز سفرها ابيض وبحساب بنكي مش ضخم اوي. جرب وقدم. الخسارة الي  هخسرتها لو لم تنجح في الحصول على التاشيرة هي مصاريف اصدارها (حوالي ٩٠٠ جنية) بالاضافة الى وقتك وتعبك وحرقة اعصابك طبعا.

اعرفوا كل خطوات التقديم على تاشيرات اوروبا وامريكا واشهر الاخطاء الي لازم تتجنبوها في المقالات والفيديوهات دي. وربنا يوفقكم جميعا في الحصول عليها بدون رفض.

55

 likes / 109 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec