15
Jul-2017

Do what you CAN’T مقالة للطلاب والخريجيين

Uncategorized   /  

بمناسبة الثانوية العامة والتخرج من الجامعات، الرسالة دي للطلبة والخريجين الجداد ولاولياء الامور كمان – تجربتي الشخصية بعد ما خلصت دراستي الجامعية >>>

عَلَقت مدام ماجدة، سكرتيرة شعبة اللغة الانجليزية في كلية التجارة جامعة الزقازيق، منشورا في مدرج الدراسة الخاص بسنة رابعة للاعلان عن ندوة خاصة بدراسات ما بعد التخرج. اهتم بحضورها عدد قليل من طلاب الفرقة الرابعة والثالثة، وللاسف لم تهتم الاغلبية وقتها باستكمال دراسات عليا بعد الانتهاء من الدراسة الجامعية وعلق اغلبهم شعار “كفاية المذاكرة الي ذاكرناها في الكلية وخلاص”

بالرغم من ان الظروف الاقتصادية في ٢٠٠١ كانت افضل كثيرا من الآن، الا اني كنت مقتنعا تماما ان التعليم الجامعي وحده غير كافي للحصول على وظيفة متميزة. اعتقدت خطأ ان الندوة عن دراسات الماجستير والدكتوراه الاكاديمية، ولكنها كانت لعرض الشهادات العملية المتخصصة في مجالات المحاسبة والادراة المالية والتمويل. استضافت اساتذة محاسبة وتمويل وادارة اعمال من الجامعة الامريكية في القاهرة للحديث عن اشهرهم.

اسهبت الدكتورة في شرح اشهر الشهادات الخاصة بالمحاسبة والمراجعة قائلة ” شهادة ال CPA -٤ مواد للدراسة في سنة واحدة وناس كتير جدا نجحت فيها واشتغلوا في شركات مراجعة كبيرة. وبعدها شرحت بالتفصيل شهادتين اسهل في الادارة المالية “شهادة ال CFM والتانية اسمها CMA – ٤ او ٥ مواد دراسة في سنة واحدة برضو وسهلين وهيقووا الCV بتاعك جدا وهيساعدوك تلاقي شغل.”

وبعد ان قاربت الندوة على الانتهاء، تحدثت عن اخر شهادة منهم برهبة شديدة ولكن بحماس اقل بكثير من الآخرين “واخيرا بقى شهادة التحليل المالي CFA. واحدة من اصعب الشهادات في مجال البيزنس في العالم. للاسف تحتاج ٣ سنين لانهاء مستوياتها الثلاثة. تحتوي على ١٢ مادة مختلفين. الامتحان بتاعها امتحان واحد فقط في السنة – نفس الامتحان في القاهرة هو الي في نيويورك هو الي في طوكيو – شهادة عالمية حقا – الامتحان مدته ٦ ساعات في ال١٢ مادة كلهم مع بعض في يوم واحد”

اكملت تأسفتها باحباط “للاسف علشان صعبة مش عندنا كورسات ليها اصلا الا المستوى الاول فقط منها – لازم تكملوها Self Study …. وللأسف تحتاج لغة انجليزية قوية جدا …. وللأسف احتمالات النجاح بتاعتها قليلة جدا ( حوالي٥٠٪ عالميا ) …. والحاصلين عليها في مصر اقل من ٢٠ واحد، ولكن بيشتغلوا في اماكن حلوة جدا ومستقبلهم في اي مكان في العالم ممتاز”

لمعت عينايا لمعة تحدي غريبة – وشعرت وقتها ان طريقة استعراضها للشهادة دي بالشكل ده انها حاجة صعبة جدا جدا ولكن مميزة جدا جدا – لم انم لمدة يومين للبحث على الانترنت لمعرفة المزيد عن الشهادة ودراستها وامتحانتها ومجالات شغلها المتنوعة والمتعددة في البنوك والبورصات وشركات الخدمات المالية شركات الاستثمار.

اقتنعت تماما ان هي دي الشهادة الى هتخليني مختلف جدا في مجالي وقررت اني اتحدى نفسي واقدم على دراستها الشبه مستحيلة. الشكر طبعا لابويا الي شجعني على دراستها وتكاليفها وقالي اعتبر نفسك في كلية الطب بتدرس ٧ سنين – وبالفعل قعدت سنتين متفرغ تماما لدراسة اول مستويين في الشهادة وانا قاعد في البيت ودرست المستوى التالت وانا في وظيفتي الجديدة “محلل مالي” في بنك استثماري.

اغلب الدراسة كانت لوحدي تماما من غير كورسات، لان كورس الجامعة الامريكية الي اشتركت فيه لاحقا كان ضعيف جدا في المستوى الاول. كان لازم اذاكر بالطريقة الصعبة من كتب كبيرة وكتيرة جدا. المنهج في المستوى الواحد اكتر من ٤ الاف صفحة. مواد كتيرة منها لم اعلم عنها اي شئ من قبل … كانت طلاسم تماما وكانت تحتاج قراءة في كل صفحة من صفحات الكتاب. مكنش في موارد وكورسات على الانترنت زي دلوقتي.

وانا متفرغ، كنت بذاكر اكتر من ١٠ ساعات في اليوم – ولما كنت بشتغل مع الدراسة، كنت بذاكر في اليوم ٤ ساعات وفي الويك اند ٣٠ ساعة مثلا. الحمدلله بعد التعب الرهيب الي شوفته في دراسة الشهادة دي لمدة ٣ سنين – كنت واحد من ٥٠ فقط حاصلين عليها في مصر ومعرفش اي حد من اصداقئي نجحوا في الحصول عليها لانهم بدأوها متأخر مع مسؤليات الشغل والعيلة.

**** افعل ما لا تستطيع فعله …… DO WHAT YOU CAN’T ****

انا على يقين كامل ان كل واحد في حياته لازم يتعب ويشقى بمستويات مختلفة في حياته. فالي بيتعب وهو صغير بصحته لسه ومعندوش مسوؤليات، اكيد هيستريح بعدين في حياته ووظيفته. والي بخل على نفسه بالمجهود في الدراسة والتعليم وعايز يدور على الحاجات السهلة وياخد الدنيا فهلوة هيتعب بعدين علشان يقدر يكمل في حياته وظيفته وتطوير نفسه. كان ممكن اختار حاجات سهلة ومضمونة ادرسها، لكن فضلت اختيار الاصعب.

نصيحتي ليك دور على الحاجات الصعبة في مجالك وادرسها واعملها – شهادات ماجستير دكتوراه كورسات تخصصات – انا عندي مبدأ طالما في حد نجح في حاجة، يبقى انا كمان ممكن انجح فيها لو دورت وعرفت السكة صح وبذلت المجهود المطلوب. دور في اي مجال انت بتحبه او شايف فيه مستقبل. بلاش استسهال والنبي. دور على شهادة صعبة ومحتاجة مجهود واعملها علشان تحقق حاجة في حياتك. تنازل عن راحتك وخروجاتك وتضييع وقتك دلوقتي.

هتتعب يعني هتتعب في حياتك. اتعب وانت لسه صغير وعندك وقت وصحة. لان التعليم هو بالتاكيد اساس مستقبلك. الدراسة الجامعية الي انت مقبل عليها او خلصتها مش هي نهاية الطريق، دي بدايته فقط. الشهادات وكورسات التعليم الاونلاين لا غنى عنها في اي مجال
واصبحت متوفرة في جميع المجالات.

مش محتاج اقنعك اكيد ان الاتقان الكامل للغة الانجليزية اصبح ضرورة مش رفاهية – علشان تقدر تشتغل وتتعلم اصلا، لان كل الشهادات والكورسات الاونلاين باللغة الانجليزية.

عرفوني في الكومنتات ناويين على ايه بعد الثانوية العامة والجامعة

ربنا معاكم جميعا ان شاء ال

0

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec