08
Nov-2016

الالبان في مصر واوروبا – توقفوا عن المقارنات الظالمة

photostudio_1478563258680

احنا كلنا بنحب نسافر علشام نتفرج على بلاد جديدة ومختلفة، واول حاجة بنعملها طول ما احنا مسافرين في اي حتة هي عمل مقارانات لا ارادية بين احوال بلدنا والبلاد التانية، وخصوصا لو كانت بلاد اوروبية متحضرة، الفرق بيكون شاسع دائما. المواصلات، النظافة، النظام، وحاجات تانية كتيرة. احيانا كتير بتكون المقارنات منصفة واحيانا اكتر بتكون سطحية ظالمة وضيقة الافق جدا.

حاسس كدة ان في اتجاه في بعض الصفحات على الفيسبوك لعمل المقارنات الغير واقعية بحثا عن الضجة و Reach وخلاص. مش فاهم ليه الصراحة؟؟ مقارنات تفتقد اي مهنية او موضوعية او مصداقية حتى. احد المسافرين المخضرمين الاعزاء نزل من كام يوم فيديو يعمل فيه مقارنة بين الالبان في اوروبا ومصر، واهم استنتاجات المقارنة هي:

– اللبن في اوروبا طبيعي علشان لازم يكون في التلاجة، بينمافي مصر كله بودرة، كله مضروب، مافيهوش اي حاجة من الحاجات الطبيعية علشان بيتخزن برة التلاجة.

– اللبن في اوروبا صلاحيته ٩ ايام فقط،  بينما في مصر صلاحيته ٦ شهور.

– اوروبا طعمه لبن طبيعي محترم، بينما في مصر طعمه حاجة تانية خالص غير اللبن وتحس انهم حاطين اسمنت.

لبن مضروب؟

– شركات الالبان المصرية عندها مزارع فيها مئات الالاف من الابقار، هل كلهم ذكور مثلا ولا ينتجوا الحليب؟؟ اكيد لأ.

– هل اناث الابقار في حالة توالد وارضاع مستمر، ويشرب لبنها جميع العجول الصغيرة باستمرار ولا يتركوا شيئا؟ اكيد لأ.

– هل شركات الالبان المصرية بتحلب الابقار بتاعتها وتصدر الالبان كلها للدانمارك والسويد علشان شعبها يشرب لبن طبيعي ويستوردوا بودرة سيراميك يعبوها في ازايز ويبيعوها للمصريين؟ اكيد لأ.

يبقى البديهي ان اللبن الي بيطلعوه من الابقار دي بيتباع في السوق المصري، واحيانا للتصدير. يبقى ما يباع في مصر “لبن” نازل من *** البقرة والمصحف الشريف. 

صلاحيته طويلة؟

علشان اللبن ده من اكتر المواد السائلة الغنية بالعديد من العناصر الغذائية التي تعتبر ضرورية لنمو الجراثيم وتكاثرها، علشان كدة لازم يتعمله عمليه بسترة للقضاء على اي جراثيم فيه (تسخين وتبريد). ايضا بيتم اضافة “لبن بودرة” كأحد خطوات تصنيع اللبن. بيتم تعقيمه وحفظه في علب “تترا باك”. لذلك يتمتع اللبن بصلاحية طويلة تصل الى ٦ شهور. حتى يسهل نقله وتخزينه وبيعه. عملية صناعية عاااالمية وبتحصل في كل بلاد العالم.

المفاجأة بقى ان اللبن ده موجود في اوروبا زي ما موجود في مصر بالزبط. ودي صورة علبة لبن من التشيك وكتوب عليها الصلاحية حتى ٢٠١٧.

انواع كتيرة من الالبان طويلة الصلاحية على الارفف بدون ثلاجة، الصلاحية حتى ٢٠١٧

20161107_213528

 السعر من ١٤-١٩ كورونا تشيكي – 0.60-0.80 يورو

لبن بودرة ولا اسمنت؟

حتى لو من متطلبات العملية الصناعية للبن طويل الصلاحية هي اضافة نسبة من اللبن البودرة، المفاجأة ان اللبن البودرة يا جماعة اصلا اصلا جاي من اللبن مش جاى من الاسمنت.

على فكرة كمان، نص اطفال مصر رضعت لبن بودرة وهي صغيرة علشان هو مش حاجة خطر ولا مضرة للصحة اصلا. ينصح به اطباء الاطفال في كل حتة. طبعا مش احسن من لبن الام الطبيعي، بس مهواش اسمنت.

الصلاحية القصيرة؟

نوع تاني من الالبان، لا يخضع لنفس عملية البسترة، وبيعيش مدة قصيرة جدا (٩-١٤ يوم مثلا) ولازم يكون في التلاجة طول وقت النقل والعرض والتخزين.

المفاجأة بقى، ان اللبن ده موجود منه في مصر زي ما موجود منه في اوروبا. بعض الشركات المصرية بتعمله بالفعل، لكن الاقبال عليه اقل من اللبن الطويل الصلاحية، نظرا لاحتياجه لثلاجة للنقل والتخزين والعرض.

20161107_213401

انهي لبن احسن؟

اكيد طبعا اللبن الطازة القصير الصلاحية يحمل فوائد غذائية اعلى من اللبن الطويل الصلاحية. البوست هنا مش للمقارنة بين فوائد اللبن الطازة عن اللبن المعلب. المشكلة دلوقتي في الملايين من البشر الي بتستهلك كميات البان مهولة، وفيش شركات البان تقدر تقدم البان طاااازجة ذات صلاحية ٩ ايام لكل البشر دي، علشان تعقيدات الحفظ والشحن والتخزين والعرض. العلم توصل الى تطويل عمر اللبن بالتكنولوجيا الحديثة، مع المحافظة على خصائصه وفوائده، قدر المستطاع.

20161107_213542

سعر الزجاجة ٢٠-٢٥ كورونا تشيكي – حوالي 0.80 – 0.90 يورو

الخلاصة

انواع الالبان الطويلة الاجل موجودة في اوروبا مثل مصر. الالبان القصيرة الاجل موجودة في مصر مثل اوروبا. الالبان المحفوظة برة التلاجة البان طبيعية، ولكن قيمتها الغذائية اقل من الطازجة المحفوظة في التلاجة. الالبان في مصر طبيعية ومش بودرة سيراميك. الاسعار بين مصر واوروبا اصبحت متقاربة بعد تعويم سعر الصرف ووصول الجنية الى قيمة عادلة.

ملحوظة

اثناء عملي في مجال التحليل المالي في البنوك والبورصة، كانت الصناعات الغذائية هي واحدة من الصناعات التي تخصصت فيها. اكبر شركات الالبان في مصر كانوا من عملاء بنكي وتعرفت من خلاله على دورة تصنيع اللبن والدراسات التسويقية الخاصة به. لم تطلب مني اي جهة او شركة كتابة هذه المقالة، ولكن دفاعا عن شركات وطنية مخلصة تقدم للسوق المحلي ما يقدمه مثيلاتها في اوروبا.

2

 likes / 2 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec