27
Sep-2016

روما في ٤٨ ساعة

ايطاليا   /  

روما في ٤٨ ساعة

رحلة ايطاليا لازم تبدأ طبعا بالعاصمة الحبيبة روما … يمكن نقابل ابوصلاح في اي حتة … تعالوا ناخدها حتة حتة

الطيران

مصرللطيران والايطاليا بيطيروا الى روما من القاهرة في اوقات كتيرة يوميا. الاسعار بتتراوح من ٢٩٠٠ – ٣٢٠٠ في شهر نوفمبر. ارجع لمقالاتي وفيديوهات لاحسن طرق لحجز ارخص تذاكر طيران.

الاقامة

قبل ما نتكلم عن اختيارات الاقامة، خليني اوريكم خريطة روما السياحية، علشان لما تشوفوا خرايط على مواقع الحجز المختلفة، تقدروا تعرفوا انتوا هتكونوا بعيد ولا قريب. كل الحاجات الي في الخريطة دي هي المزارات الاشهر في روما، كنائس ومتاحف و معابد ومسارح وميايدين. احفظوا شكل النهر الي معدي ده، علشان تاخدوه علامة مميزة في الخرايط الي جاية.

rome-sightseeing-map

١- الهوستلز متوفرة كتير في روما، تتراوح من ١٠-٢٥ يورو في اليلة. لكن معظمهم هيكونوا حول محطة القطارات الرئيسية في المدينة Termini Station في شرق المنطقة السياحية لروما. الخريطة دي موضحة اماكن الهوستلز. ياريت تقروا الريفيوهات بتاعتها كويس وانت بتختاروا من مواقع الحجز hostelbooks or hostelworld

rome-hostels-map

٢- الفنادق طبعا منتشرة في كل حتة في وسط مدينة روما، لكن الارخص هيكون برضو حو منطقة محطة القطارات. ممكن من ٢٠-٣٠ يورو الليلة لفردين، يعني لو انتوا اتنين ممكن تكون ارخص من الهوستل كمان. الخريط دي موضحة منطقة الفنادق الرخيصة. اقرأوا الريفيوهات كويس قبل ما تحجزوا من booking or hotelscombined

rome-hotels-map

٣- الاقامة في الشقق المفروشة من خلال موقع Airbnb ممكن توفر بدائل رخيصة للمجموعات (اسرة من ٤ افراد او شلة اصدقاء). الموقع مليان اختيارات كتيرة. الميزة المهمة كمان هي توفر مطبخ ممكن تستخدمة في الاكل.

الانترنت

لو عايز انترنت اثناء رحلتك، وباقة التجوال بتاعتك غالية عليك، انصحك وبشدة تجيب خط محلي اول ما توصل. علشان الخرايط والتطبيقات تكون شغالة معاك وتقدر تعرف تروح وتيجي بالمواصلات بسهولة. انا اشريت خط من شركة TIM ب٣٠ يورو وفيه ٤ جيجا انترنت. من غير مكالمات ولا رسائل. يعني لو قاعد اسوبع في ايطاليا هيكون كافي جدا، لان عندك wifi في محل اقامتك ومعظم الكافيهات.

المواصلات

“حقيقة علمية يجب ذكرها علشان اكتشفت ان ناس كتيرة مش عارفاها: GPS  بيشتغل من غير انترنت يعني لو انت في اي مكان ومعاك خريطة على التليفون من اي تطبيق، انت متوصل بالقمر الصناعى وهيقولك انت فين على الخريطة. مش محتاج انترنت ولا تجوال ولا اي بطيخ.”

GPS شغال في اي مكان في العالم بدون انترنت

١- اول ما توصل مطار روما، دور على اتوبيس Sitbus ، بيتحرك كل ٤٥ دقيقة لحد ٩ بالليل، بيوصلك لحد محطة القطار الرئسية Tremini في حوالي ٤٥ دقيقة. سعر التذكرة اتجاه واحد ٦ يورو. اعرف مكانه فين في محطة القطر علشان تركبه وانت رايح المطار وراجع بلدك.

٢- شبكة مترو الانفاق والاتوبيسات العامة مغطية كل انحاء روما. اسعار التذاكر بتختلف على حسب مدتها:

– التذكرة لمرة واحدة: ١.٥ يورو، ومدتها حوالي ساعتين، لكن لو اشتريت تذكرة مدة اطول هتكون اوفر:

– التذكرة لمدة يوم كامل ٧ يورو – يومين ١٢.٥ يورو – ٣ ايام ١٨ يورو

Google  Maps هيقولك كل المعلومات عن جميع خطوط المترو والاتوبيس. قبل ما تتحرك من الفندق او الهوستل، وانت لسه معاك wifi, اعرف خطة يومك ماشية ازاي واعرف جميع المحطات الي هتركب منها وتنزل فيها قبل ما تبدأ يومك. او تعمل download لاي تطبيق خرايط وارشادات طرق زي maps me او here علشان تعرف الطرق. معك GPS شغال من اي مكان هيقولك انت فين على الخريطة واتحرك عليه.

٣- الرجلين

بصراحة، احلى حاجة في روما هي التمشية بين ميادينها وشوارعها. انا شخصيا لم استخدم تذاكر مترو واتوبيس كتير. لو انت ساكن عند محطة القطر، ممكن تاخد تذكرة واحدة تروح بيها الصبح اماكن زياراتك وتتمشى طول اليوم واخر اليوم ترجع بتذكرة تانية. يبقى ٣ يورو في اليوم كله. لو مش بتحب المشي كتير، يبقى اشتري تذكرة ال ٤٨ او ٧٢ ساعة اوفر حاجة. باستخدم طبعا الخريطة المتحملة على تليفوني وGPS وامشي عليهم.

البرنامج السياحي

لو بصيت على خريطة روما السياحية، هتلاقي كل حاجة لازقة في التانية. انا في اعتقادي يومين كافيين علشان تشوف كل حاجة مهمة في روما. لو فتحت باب المتاحف والمعارض، ممكن تقعد اسبوع في روما ومش هتخلصها. لكن احنا بنتكلم بشكل عملي وواقعي.

48-hours-rome-visit

اليوم الاول:

ابدأ بزيارة الفاتيكان. الميدان والكنيسة ببلاش، لكن التذكرة الكاملة للمتحف ب١٦ يورو. هتلاقي ناس كتير بتبيع تذاكر للمتحف وجولات في الفاتيكان. سيبك منهم وكمل طريقك. دخول المتحف زحمة، روح بدري علشان مش تضيع وقت كتير في الانتظار.

بعد الفاتيكان ممكن تزور قلعة سان انجلو – التذكرة ب١٢ يورو. وبعد كدة اتمشى على ضفاف النهر والكباري الحلوة القصيرة الي قدامه. مكان اقامتك هديك خريطة زي دي، خذها منها وافتح GPS بتاعك وتجول بين الميادين والنوافير والكنايس الي في المنطة الاولى.

اليوم الثاني:

ابدأ من اقصى الجنوب الشرقي، من اشهر معالم روما، الكوليسيوم. الصور من برة احلى بكتير من جوة، لانه متهدم جدا من جوة. تذكرة الدخول ١٢ يورو. ممكن تقضي ساعة او اتنين متجولا داخله. بعديه في منطقة زيارات اخرى امسها Palatin Hill في بقايا قصور ومعابد قديمة، المتهدم منها اكثر من القائم. ممكن تاخد جولة ساعتين او تلاتة فيها لانها كبيرة شوية. ممكن تاخد audio guide لو انت من هواة التاريخ علشان تعرف تاريخ كل حاجة.

بعد كدة تكمل تمشية واستكشاف روما على نفس الخريطة دي. الموبايل معاك عليه خريطة روما، فاتح GPS وشايف انت فين على الخريطة، انطلق وكمل اكتشاف المدينة.

اهم ميادين روما الي تشوفها ونوافيرها بالنهار وبالليل كمان – حلوين جدا وليهم طعم مختلف بالنهار وبالليل

Trevi Fountain – Spanish Steps – Piazza Navona –

٤٨ ساعة في روما

اقتراحي انك تقضي في روما ٤٨ ساعة فقط. توصل في نص اليوم الاول – تعمل check in في الفندق بتاعك – تحط الشنط بتاعتك – تنزل تكتشف بعض الميادين والنوافير – تنام في الفندق – تصحى بدري تاني يوم وتبدأ جولتك باليوم الاول زي ما شرحت – تنام تاني ليلة في الفندق – تالت يوم تعمل check out وتسيب الشنطة في الفندق – وبعدين تعمل جولتك لليوم التاني زي ما شرحت – ترجع اخر اليوم تاخد شنطك وتسافر على محطتك القادمة “فلورانس” وتنام في الاتوبيس وانت رايح (انا اخترت اطول اتوبيس علشان انام اكتر عدد ساعات). لو مش عايز كدة، بات في روما تالت يوم، وامشي الصبح بدري جدا على فلورانس.

المقالة الجاية نحكي عن ٤٨ ساعة في فلورانس

 

هنزل مقالة عن الاكل في ايطاليا كلها

3

 likes / 2 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec