18
Sep-2016

ازاي اختار فنادق في بالي؟

bali-accomodation

الاقامة

اول حاجة لازم تعرفها وانت بتقرر هتسكن فين في بالي، هو ان جزيرة بالي جزيرة كبيرة وزحمة والمواصلات فيها مش رخيصة. علشان كدة قرار تسكن فين ممكن يوفر ليك فلوس كتير ومجهود كبير في التنقل بين الانشطة والاماكن.

محور الاقامة الاساسي في بالي هيكون مرتبط بطبيعة الي هتعمله في بالي … والي بيتمحور حول حاجتين اساسيتين. الاولى هي الشواطئ والثانية هي الانشطة الترفيهية او المغامراتية.

بعد ما اقمت في اكتر من مكان وعملت انشطة كتيرة في بالي، اقترح عليك تقسم اقامتك على مكانين او ثلاثة في رحلة ١٠ ايام مثلا. طبعا الاقتراح ده بيفترض ان معندكش مشكلة في توضيب شنطك مرتين في الرحلة، لان في ناس بتحب تسافر وتوصل مكان وما توضبش الشنطة غير مرة واحدة بس قبل الرجوع من السفر. ممكن تقيم في مكان واحد طبعا ولكن ميزانية المواصلات هترتفع حبتين وهتضيع وقت في الرايح والراجع كتير. 

اولا الاقامة بجوار الشواطئ ….  اول حاجة في بالي كدة بالبلدي هي “البحر” … شواطئ بالي حلوة جدا طبعا، وبتختلف طبيعتها من شاطئ للتاني. اشهر وازحم الشواطئ هي الي على الجانب الغربي لجزيرة بالي (خريطة). الشاطئ الاشهر طبعا هو “كوتا” Kuta …. بس افتكر اني قولتلك بلاش!! اولا زحمة جدااااا جدااااا … لانه الاقرب لناس كتير ويعتبر الملتقى الاساسي للعائلات الاندونيسية الفقيرة الحال. فتلاقي صفوف صفوف من البشر المحليين، يتخللهم بعض الاجانب زي حضرتك. الخدمات الي عليه رخيصة طبعا، علشان كدة زحمة. قد يكون “كوتا” من اشهر الشواطئ لركوب الامواج لاسباب تقنية انا معرفهاش، بس انا لما روحته، ما اتكيفتش.

لو اتمشيت ١٠ دقائق شمالا من شاطئ كوتا، هتلاقي اول شاطئ لطيف جدا اسمه  “ليجيان” Legian…. اهدى كتير من زحمة كوتا، معظمه سياح، ورملته ناعمة جدا، وعليه ركوب امواج زي كوتا بالزبط. لو اتمشيت شمالا ربع ساعة كمان، هتلاقي بقى كريمة الكريمة، شاطئ “سيمنياك” …. ده نقدر نقول عليه “الزمالك” بتاع الشواطئ الغربية لجزيرة بالي. منتشر عليه Beach Clubs حلوة جدا بس غالية طبعا- (La Plancha مثلا وما حوله)  … لكن تقدر تقضي يومك في اي مكان يعجبك لو اشتريت ازازة حاجة ساقعة. مفيش تذكرة دخول ولا minimum charge. وتقريبا يخلو من السكان الاصليين. قد تتخيل اصلا انك على احد شواطئ فلوريدا. وحيث اني كنت في امريكا من كام شهر، اعتقد من وجه نظري كمان، ان سيمنياك ده احلى من ميامي بيتش نفسه من حيث الVibe.

في نفس المنطقة دي في Beach Clubs بحمامات سباحة كمان وفيها حفلات احيانا – Potato Head مثلا واحد منهم. تقدر تقضي فيها يوم كامل من الاستجمام، ونفس الكلام، من غير تذاكر ولا Minimum. 

طبعا علشان تسكن في فندق يطل على البحر مباشرة، هتدفع كتير اوي، علشان كدة انصحك تبعد ٥-١٠ دقائق مشي، وهتلاقي الاسعار نزلت جامد جدا.

المناطق المحاذية للثلاثة شواطئ دول مليانين هوستلز وفنادق ومطاعم ومحلات وبارات، ومتدرجين في حلاوتهم واسعارهم كمان زي الشواطئ كدة.

انا عملت غلطة ونزلت في الاول في فندق Atanaya في كوتا، على شارع صلاح سالم بتاع بالي، اسمه Sunset Road، ويبعد ١٠-١٥ دقيقة سواقة عن البحر او اي مناطق خروج بالليل للعشاء او السهر. بعد كدة قررت نقل اقامتي بجوار ليجيان او سيمينياك. بالفعل لقيت فندق حلو جدا اسمه Primera Semnyak Hotel بحوالي ٢٠٠ جنية مصري بالفطار. تمشية بسيطة وتكون في احلي بيتش ، حوليك كل الخدمات الي تتخيلها. هتلاقي فنادق كتيرة متوسطة وحلوة في حدود ٢٠٠-٣٠٠ جنية في المناطق دي. لو عايز حاجة دلع علشان شهر العسل، موجود طبعا … اتفرج على booking.com وعيش حياتك …  بس خليك في الفنادق الي في المربع ده من الخريطة (حول شارع ليجيان)…. في طبعا هوستلز في كذا مكان، اسعارها ممكن من ١٠٠ جنية في الليلة في كوتا واغلى شوية في سيمينياك.

seminyak-hotels

ثانيا الاقامة بعيد عن الشاطئ ….. لما تكون ريحت على البحر وزهقت من اللون الازرق بتاعه، دلوقتي عايز شوية ادرنالين وانشطة حلوة، انصحك تنقل اقامتك لمنطقة اوبود – Ubud، في وسط منطقة بالي، وتمتع عينك باللون الاخضر. طبيعة المنطقة مختلفة تماما لانك في وسط تلال وتلال من مزارع الرز والنخل والاشجار حواليك في كل مكان. المنطقة هنا بقى مليانة انشطة في الجبال والانهار والمعابد والزيارات. انصحك تاخد حاجة بحمام سباحة لطيف، لان معندكش بحر تنزله. خليك في المربع ده من اوبود– قريب من غابة القرود ومدرجات الرز الشهيرة … بعض الناس بتنتقد ان اوبود بالليل بتكون اهدى ومملة شوية بالمقارنة بمنطة كوتا وسيمنياك.

ubud-hotels-map

انا للأسف لم اقم في منطقة اوبود، ولكن عملت انشطة كتيرة حولها. كنت بضيع من ساعة الى ساعة ونص او اكتر علشان اروح اعمل اي نشاط او مغامرة وارجع تاني الفندق في الجنوب. تكلفة المواصلات كانت غالية شوية علشان المشوار، ومالحقتش استمتع بجمال اوبود.

نصيحتي تقيم ٣-٤ ليالي في اوبود، علشان تعمل الانشطة ارخص وتستمتع بجمال الطبيعة المختلفة تماما عن جنوب بالي. 

الفقرتين دول للي عايزين يتحركوا كتير ويجربوا مناطق مختلفة وجديدة:

المنطقة الثالثة الي زورتها وكانت مختلفة خالص بقى كانت اقصى شمال بالي، لما عملت زيارة يوم واحد لشاطئ Lovina لوفينا والمناطق المحيطة بيها. جبال وشلالات حواليك في كل حتة، وكمان بحيرات رائعة المنظر. الطبيعية مختلفة عن اوبود علشان الجبال اعلى واحلى كتير وطبعا حيث وجدت الجبال، هتلاقي شلالات مستخبية في وسط الغابات. لو انت من عشاق الطبيعة و hiking, انصحك تقيم هناك يوم او اتنين، مش هتندم. لكن ممكن تزورها من اوبود.

north-bali-map

المكان الي ما زورتوش وكان نفسي اجربه هو الجزر الصغيرة القريبة من بالي، واشهرهم الثلاثة جزر Gili Islands –  اكبرهم Gili T … بتاخد مركب الصبح من بالي وتروح تقضي اليوم وتبات ليلة او اتنين وترجع تاني يوم في مركب. جزيرة مش عليها اي عربيات ولا موتوسيكلات …. عودة الى الطبيعة بجد. اختيارات الاقامة عليها معقولة. انا ما زورتهاش علشان اقولكم تفاصيلها، بس انصحكم تكتشفوا الاوبشن ده. 

gili-islands

الخلاصة

دي الاماكن الي زورتها وشوفتها وسمعت عنها في بالي، اكيد طبعا في اماكن كتيرة حلوة في بالي (Nusa Dua, Sanur, South Nusa Dua ).  لكن الدروس المستفادة من رحلتي والي اقدر انصحك بيها هي انك قضى ٦٠٪ من اجازتك في بالي في منطقة الشواطئ (سيمنياك مثلا) وال٤٠٪ في منطقة اوبود للانشطة والاستمتاع بالطبيعة. ممكن تبدأ بالانشطة المتعبة في اوبود الاول وبعدين تنقل سيمنياك او العكس. شئ يرجعلك.

دور على مواقع booking و hotelscombined واتفرج على الصور واقرا التعليقات والتقييمات علشان تقرروا. الفيديو ده فيه طريقة استخدام مواقع الحجز المختلفة علشان نعمل حجز الفنادق

نصيحة اخيرة عن حجز فنادق في بلد ما تعرفهاش وخايف منها:

انا قبل ما اسافر من القاهرة الى بالي، كنت حاجز ٤ ليالي فقط من ال١١ ليلة الي كنت قاعدهم هناك. ليه بقى؟ قولت اوصل استكشف الدنيا فيها ايه وبعدين ابقى اغير اقامتي لو المكان معجبنيش. الموضوع سهل ومش صعب خالص، لانك دائما هتلاقي فنادق فاضية واسعارها مش بتغلى لما الوقت يقرب زي تذاكر الطيران. وصلت فندق عجبني، اكمل فيه، معجبنيش، ادور على واحد يعجبني وانقل فيه. بسيطة وسهلة. عمر ما كان فيه مكان في العالم ١٠٠٪ متقفل غير لو في مناسبات زي راس السنة في بعض المدن حول العالم، او المهرجانات الموسيقية، المعارض الدولية، المناسبات الرياضية. غير كدة، دايما هتلاقي اوض كتييير فاضية في فنادق كتييير حلوة.

2

 likes / 10 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec