21
Sep-2016

الفيزبا هي الحل – ولكن في حاجات تانية كتير في بالي

%d9%85%d9%88%d8%a7%d8%b5%d9%84%d8%a7%d8%aa-%d8%a8%d8%a7%d9%84%d9%8a-%d9%85%d9%82%d8%a7%d9%84%d8%a9

للأسف الشديد مفيش مواصلات عامة في جزيرة بالي، علشان كدة موضوع المواصلات ممكن يكون مكلف حبتين. لكن في طرق كتيرة ممكن توفر معانا كتير، بس للأسف الموضوع بيختلف من شخص للتاني. استخدام المواصلات في بالي بيكون لحاجتين اساسيتين: اولا المشاوير القريبة من محل اقامتك ومكسل تتمشى شوية …. عايز تروح الشاطئ ده ، او عايز تروح تاكل في مطعم معين، او عايز حتى تروح تشتري حاجة من مول او حتى مغسلة. ثانيا المشاوير البعيدة او الزيارات السياحية من معابد وانشطة وخلافه. خليني بقى دلوقتي اقولكم على جميع البدائل الي عندنا، ومميزاتها وعيوبها:

١- التاكسي 

طبعا ده اسهل طريقة تنقل بيها في اي بلد. سايح سايح يعني. توقف تاكسي وتركب تقوله العنوان او توريه الخريطة من تليفوتك وتوصل. التاكسيات في بالي لونها ازرق ولبني بدرجات مختلفة. احسن شركة جربتها هناك هي Blue Bird، هتلاقيها مكتوبة على العربية من كل حتة. ليه بقى؟ علشان هي التاكسيات الوحيدة الي بتشغل عداد. فتحة العداد ٧٠٠٠ روبية ($0.52) وكل كيلو ٦٥٠٠ روبية($0.5). انا عملت مشاوير قصيرة سريعة داخل كوتا او سيمنياك ودفعت ٢٠ الف روبية مثلا، يعني ٢٠-٣٠ جنية ولا حاجة. لكن المشاوير البعيدة طبعا العداد بيزيد جامد. احد اشهر المعابد “Uluwatu” في اقصى جنوب غرب بالي – يبعد ٢٥ كيلو من كوتا، يعني بالتاكسي ممكن يكلفك ٣٤٠ جنية رايح راجع. لو حبيت تروح جمبران في الجنوب برضو تاكل اكلة السمك الشهيرة، ممكن تدفع ٢٥٠جنية رايح راجع.

لو عايز تروح بقى المشاوير الابعد في شمالا في اوبود مثلا، بتتكلم في ٥٠ -٦٠ كيلو المشوار، يبقى هتدخل في ٧٥٠ جنية رايح راجع. يبقى استخدم التاكسي لو مشاويرك قريبة. لو تايه في حتة وعايز تروح وتخلص. شغال جدا. 

المشكلة الاساسية بقى في التاكسيات داخل مناطق المدينة المتكدسة بالعربيات هى الزحمة. الشوارع في بالي اغلبها فردتين رايح راجع. ممكن مشوار بالتاكسي ياخد منك وقت كتير علشان الزحام.

وسيلة الدفع: العيب الاساسي في التاكسي هو انك لازم تدفع كاش – يعني لما هتحسبها بالجنية في الاخر هتحسبها بسعر السوق السوداء للدولار. افتكر انك كل ما دفعت بالبطاقات البنكية، هتوفر ٣٠٪ من المصاريف لما تقارنها بسعر السوق السوداء.

blue-bird-taxi

٢- اوبر Uber 

اوبر موجود في بالي بس على المستخبي والمداري كدة. عندهم مشاكل طول النهار والليل مع سواقين التاكسيات والحكومة. الفنادق والمطاعم متاضمنة معاهم وبتعلق يفط ممنوع اقتراب اوبر من المكان. انا جربته مرة واحدة وانا رايح المطار وكان ارخص النص مثلا من التاكسيات. يعني تاكسي اعرفه طلب مني ١٠٠ الف روبية بعد الفصال،  لكن اوبر اخد مني ٥٠ الف روبية. لازم ما تقولش انه اوبر قدام اي حد من السواقين في الشارع، قول السواق بتاعي وخلاص علشان تتفادى المشاكل. (صور ممنوع اوبر). في تطبيق مشابهة اسمه Grab Taxi

وسيلة الدفع: اوبر كمان بيوفر اكتر واكتر علشان تقدر تدفعه بالكريديت كارد. 

٣- تأجير عربية 

انا فكرت في تأجير عربية وانا بخطط للسفرية، لكن بعد ما وصلت لغيت الفكرة تماما:

  اولا، لو محل اقامتك قريب من المناطق الحيوية في سيمنياك واوبود، مش هتكون محتاج عربية للمشاوير الحياتية اليومية.

  ثانيا، طبعا الشوارع زحمة جدا ومملة والركنة صعبة لو مش مستحيلة.

  ثالثا، الدركسيون هناك على اليمين والفتيس بالايد الشمال وكل الاتجاهات ملخبطة وممكن تعمل حادثة لو معرفتش تركز وتعكس كل حاجة في مخك.

 رابعا، ودي اهم واحدة، تأجير العربية اصلا تكلفته ٢٠ دولار في اليوم وتأجير عربية بسواق بالبنزين بحوالي ٣٠ دولار في اليوم للمناطق القريبة من كوتا واوبود، لمدة ٨-١٠ ساعات.

يبقى اقتراحي ليك للمشاوير البعيدة والزيارات السياحية، انك تأجر عربية بسواق يعمل بيك مشاوير كتير اوي مرة واحدة. انا مثلا اخدت عربية بسواق من كوتا وروحت زيارة اوبود، لفينا لفة اكتر من ٦ اماكن مرة واحدة – من ٩ الصبح لحد ٨ بالليل … السواق بيكون المرشد السياحي بتاعك، بيقترح عليك حاجات وانت تختار تزور ايه فيها. بيبقى عنده خط سير للحاجات السياحية الي تتزار جنب بعضها مرة واحدة. بيبقوا فاهمين طبعا كويس خط السير الكويس الي يوفر وقت ومجهود.

هو طبعا بيكون متفق مع بعض الاماكن يجيب ليها الزباين بتوعه، زي سواق اتوبيس اي رحلة لما يركن في استراحة معينة على طريق سفر علشان صاحب الكافيتريا يعشيه مثلا. السواق عرض عليا مثلا زيارة مصنع للفضة والتحف ومش عارف ايه، بس رفضت علشان عارف شغل البازارات ده. خدني وداني الصبح عرض مسرحي كان اسمه abcdefg ومدته ساعة مثلا وتذكرته ب١٠٠ جنية، ولكن كان سئ اوي بصراحة. في مقالة المزارات هقولكم على تفاصيل كل حاجة تعملوها.

خدت نفس السواق في يوم تاني مع صديق مصري واسرته وروحنا اقصى شمال بالي لمشاهدة الدلافين، وزيارة الجبال والشلالات، وبعض المعابد والزيارات الاخرى، لكن التكلفة كانت حوالي الضعف (٦٠ دولار) لان المشوار حوالي ساعتين واليوم بيبدأ من ٣ الصبح مثلا لحد ٧ بالليل. لكن لما تقاسمنا التكلفة، كان السعر مناسب ليوم طويل زي ده.

علشان كدة عددكم في الرحلة هيفرق كتير في بند المواصلات البعيدة ده. لان العربية الاكثر انتشارا هنا في بالي هي التويوتا الافانزا، والي عندها كنبتبن ورا السواق وممكن تاخد لحد ٦ ركاب. طبعا لما تقسموا تكلفة العربية على ٥-٦، غير لما تكون لوحدك.

لو انتوا مجموعة، ممكن تأجروا عربية وتعملوا بيها Road Trip في جميع انحاء جزيرة بالي، بس بعد ما تكونوا خلصتوا الجزء الجنوبي المزدحم منها (كوتا وسيمنياك واوبود) – الدنيا بعد كدة رايقة ولطيفة وممكن تكتشف كل حاجة بالGPS بدون مشاكل.

وسيلة الدفع: احد عيوب الاوبشن ده ان سواقين العربيات الخاصة دي طبعا بياخدوا فلوسهم كاش، يعني لما تحسبها هتحسب الدولار بالسعر الغير رسمي. 

avanza-car-bali

٤- الموتوسيكل – الفيزبا

خلصنا كلام عن الاربع عجلات، نتكلم بقى عن اوبشن العجلتين. طبعا بالي اصلا ماشية على عجلتين اكتر من اربع عجلات. اغلب الناس عندها موتوسيكلات. اسراب اسراب من الموتوسيكلات ماشية ورا بعضها، احيانا بشكل منظم او بشكل عشوائي. الموتوسيكل هو الحل الامثل لتفادي الزحام بتاع بالي، خصوصا في المشاوير القصيرة – ١٠-٢٠ دقيقة.

في شركات تأجير شوفتها على النت كانت بتأجر الموتوسيكل ب١٣ دولار في اليوم. قعدت الف اول يوم وصلت فيه لحد ما لقيت واحد في ميدان سيمنياك بيأجرها بحوالي ٤ دولار في اليوم – ٥٠ الف روبية، ومعاها خوذتين طبعا. يعني مشوارين تاكسي قصيرين كانوا بتكلفة  تأجير فيزبا يوم واحد. لو كنت خدتها اسبوع او ١٠ ايام كان ممكن تكون ارخص كمان.  

انا عندي فيزبا في القاهرة بسوقها وبعمل بيها مشاوير، علشان كدة كنت متشجع على استخدامها في بالي. لكني كنت خايف علشان معايا نور بنتي راكبة ورايا. علشان كدة كنت دائما ماشي على سرعة اقل من ٤٠ كم/ساعة، وجنب الرصيف دائما. 

انا عارف ان في ناس هتكون خايفة من تجربة الموتوسيكل، لاعتبارات الامان، بس والله هو ركوب الفيزبا لوحده اصلا متعة لوحدها والشوارع ماشية بالراحة اصلا. اثناء اقامتي في منطقة في كوتا بعيد، كنت بتحرك بيها طول اليوم … للبحر او للمطعم او للخروج بالليل. روحنا بيها كمان مشاوير بعيدة زي Uluwatu و Jimbaran… والي بيبعدوا حوالي ساعة من كوتا (٢٥ كيلو)

اقولكم الصراحة، انا لو كنت لوحدي الرحلة دي، كنت اجرت موتوسيكل واخدت شنطتي على ضهري و لفيت بالي من الغرب للشمال للوسط للشرق للجنوب في حوالي اسبوعين … دي خطة سفر مشهورة بين كتير من المسافرين الي بيزوروا بالي. 

لو قررت تأجر موتوسيكل، دول الوصايا الخمسة الي لازم تعملهم:

١- اتأكد ان كل حاجة شغالة كويس فيه – خصوصا الفرامل والانوار والاشارات… خلي الراجل يوريك كيفية استخدام كل حاجة فيه. 

٢- اتأكد ان العجل مش ممسوح ومستهلك اوي … اتفرج على الموجود واختار اجددهم عجلا.

٣- اتأكد من اي خدوش فيه وصورها قبل ما تستلمه صور او فيديو … بعدين وريها لصاحبه علشان وانت بترجعه مش يتبلى عليك ويقولك جرحته وادفعلي حق السمكرة 🙂

٤- اتأكد من مستوى البنزين وانت بتستلمه واتفق معاه هترجعه عند نفس مستوى. (Gas Policy)

٥- مش مطلوب منك رقصة قيادة دولية علشان تأجر الموتوسيكل، لكن خليها معاك علشان لو البوليس وقفك هياخد منك فلوس مخالفة قيادة بدون رخصة.

وسيلة الدفع: كاش

14156394_1032195293567601_326961731_n

٥-  التاكسي الموتوسيكل Ojek 

لو بتخاف تسوق موتوسيكل او مش بتعرف، لسه عندك الفرصة انك تركبه وراء سواق محترف من أهل البلد. كتير عندهم موتوسيكلات بيشتغلوا عليه تاكسي. هتلاقيهم بيعرضوا عليك خدمات التوصيل وانت خارج من الشواطئ او المطاعم في الحتت الزحمة. وكمان عندك تطبيق زي Uber بالزبط اسمه Gojek، بتطلب بيه موتوسيكل وتشوف ااقرب واحد ليك تطلبه. انا مجربتوش، بس اسعاره اكيد اكيد ارخص من التاكسي او اوبر. 

وسيلة الدفع: to be checked

٦- Kura Kura Bus

لو انت مسافر لوحدك، ومش متقبل فكرة الموتوسيكل وخايف منها، تكلفة ايجار العربية هتكون غالية عليك. في الحالة دي ارشحلك “كورا كورا” …  علشان مفيش خدمة المواصلات العامة في بالي، بدأت شركة خاصة بتقديم الخدمة عن طريق اسطول اتوبيسات مكيفة، وفيها Wifi كمان، وكتبت عليه Public Bus. اتوبيس اخضر في اصفر هتلاقيه ماشي في شوارع بالي كتير، وبيغطي اغلب احيائها السياحية (صور الاتوبيس).

kura-kura-bus

لما تشوف الخريطة بتاعته هتلاقيها عاملة زي شبكة خطوط المترو – مكون من ٨ خطوط بثمانية الوان مختلفة – ٤٨ محطة – تقاطعات بين الخطوط علشان تغير من خط للتاني – ومحطة رئيسية في النص بينهم جميعا (ما عدا خط واحد). (خريطة) الاحلى من كدة كمان ان الاتوبيس ليه تطبيق على الموبايل عليه الخرايط والمواعيد وكل حاجة عن الخدمة. كل حاجة عن الخدمة على الموقع بتاعهم www.kura2bus.com 

kura-bus-map

التذاكر نوعين.

1- Coin للركوب مرة واحدة – بتتراوح من ٢٠ الى ٨٠ الف روبية – ($1.5 – $6) – على حسب الخط الي هتركبة . التذكرة دي تعتبر اغلى حاجة. ما فرقتش حاجة عن التاكسي.

٢- تذكرة متعددة الاستخدام – تركب بيها جميع الخطوط طول فترة صلاحية التذكرة، والي بتتراوح من يوم لحد اسبوع – سعر اليوم مثلا ١٥٠ الف روبية – ($11.5).

يعتبر سعرها كويس لما تحب تروح الاماكن البعيدة عن منطقة اقامتك في كوتا او سيمنياك – 

زي اوبود مثلا (بس لازم تحجز اونلاين).

التذكرة الاسبوعية بحوالي ٤٥٠ الف روبية (35$) وبتقدر تشتريها بكارت البنك اونلاين او من محطات بيع التذاكر … يعني لما تحسبها بسعر الدولار الرسمي هتكون بحوالي ٣٢٠ جنية مصري. وبتخليك تغطي اماكن كتيرة اوي في بالي. حتى لو مش هتقدر تروح بيها كل الاماكن، ممكن تستخدمها كوسيلة تقربك من الاماكن الي عايز تزورها. يعني ممكن تروح بالاتوبيس لحد اوبود – ومن هناك تعمل زيارات وانشطة وترجع تاني. 

انصحك تجرب تذكرة ال٣ ايام الاول، وتشوف هتستريح معاها ولا ايه. انا شخصيا لم استخدمه، يا ريت تشاركونا تجربتكم مع الخدمة دي.

الخلاصة

تكلفة المواصلات في بالي هتختلف من واحد للتاني بشكل كبير …. لو مسافر لوحدك غير لو مسافر مع صحابك …. لو بتحب تركب الموتوسيكلات غير لو ما بتحبهاش. معاك بطاقات بنكية شغالة كويس ولا هتدفع كل حاجة كاش. اعتقد دلوقتي عندكم فكرة عامة عن الموضوع، لما تروحوا قرروا بقى ايه الانسب.

3

 likes / 9 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec