03
Jan-2017

تدريب سفر: رحلة جماعية ولكن بشكل مختلف

photostudio_1483409157663

لقد اتخذت القرار يا جماعة …. بناء على طلبات عديدة من متابعين اعزاء، قررت اعمل رحلة جماعية ولكن بشكل مختلف تماما. خليني حكي لكم الحكاية …. 

الرحلات السياحية ضد مبادئي 

انا هدفي الاساسي من وظيفة “التدوين عن السفر” عن طريق المقالات والفيديوهات هي تشجيع وتعليم الناس كل حاجة عن السفر. الحمدلله في ناس كتير قدرت تتخطى مخاوفها من السفر للمرة الاولى واستثمرت وقتها ومجهودها في القراءة والبحث عن كل حاجة وخدت الخطوة وحجزت وسافرت لوحدها بدون تنظيم شركات سياحة. لكن علشان كلنا نختلف عن بعضنا في درجات الحيطة والحذر والخوف من المجهول، في ناس تانية اكتر ماقدرتش تاخد الخطوة، او مش لاقية الصحبة الي تشجعها على السفر لوحدها. ده طبعا شئ طبيعي جدا وانا متفهمه جدا من كتر التفاعل مع اسئلتكم الدائمة.

دائما بيجيلي طلبات بتنظيم رحلات سياحية ولكن كنت دائما برفض لانه بيتعارض مع مبادئي الشخصية تجاه مهنة “مدون سفر” رسالته تعليم الناس ازاي يسافروا ويكسروا حواجز الخوف, ويعتمدوا على نفسهم في كل شئ, لانهم هيقدروا يوفروا ويستمتعوا اكتر بكتير.

خطأ لغوي وراء الفكرة

الحل الوحيد الي قدرت اتوصله بصراحة استوحيته منكم بسبب التباس لغوي بسيط في اسم الصفحة والموقع … ازاي؟

 اسم الصفحة والموقع بتاعتي Couch Traveler والي تعني بالعربي “مسافر الكنبة” ولا تعني “مدرب سفر –  Travel Coach”…. مسافر الكنبة هو اسم مستوحى من طريقة سفري مستخدما موقع Couchsurfing  للاقامة المجانية – علشان بنام في بيوت الناس على الكنبة والتي تدل ايضا على طريقي سفري الاقتصادية الموفرة. المعنى التاني ليها هو ان حضرتك تعتبر “مسافر الكنبة” الي قاعد على كنبة بيته بيسافر معايا من خلال الفيديوهات بتاعتي، والي مستوحاه من لقب “حزب الكنبة” الي طلع ايام الثورة. ارجعوا للمقالة بتاعتي الخاصة بالموضوع ده في اللينك ده. 

لما تكرر الخطأ اللغوي ده كتيراوي قولت والله فكرة … اشتغل مدرب سفر،  ازاي بقى؟ فكرت في فكرة اني اعمل رحلات جماعية ولكن بشكل غير تقليدي شوية. خليني اقولكم الفرق ايه.

الرحلات السياحية التقليدية

قبل ما اشرح لكم فكرتي, خليني اقولكم على مميزات وعيوب الرحلات السياحية العادية والي متوفرة بكثرررررة من شركات سياحية وافراد على صفحات الفيسبوك والانترنت.

الرحلات الي كل الناس بتعملها, مع كامل حبي واحترامي ليهم ولشغلهم طبعا, بتكون عبارة عن “وجبة كاملة متكاملة” – خدمة ٥ نجوم للباشاوات … بتدفع مبلغ معين من الدولارات لرحلة اسبوع في مكان ما، شاملة حجز طيران وفندق واتوبيس سياحي ومرشد سياحي ومترجم و برنامج سياحي للمزارات او مطاعم والسهرات كمان …. كل حاجة من الالف للياء بتكون جاهزة علشان تحقق اقصى متعة ممكنة في الرحلة. كل حاجة بتتعملك وانت زي الباشا من غير اي مجهود.

في مقابل الخدمة الخمس نجوم دي، بتدفع ثمن الرحلة المطلوب والي شامل تكاليف الرحلة بالاضافة الى اجر شركة السياحة نظير خدمتهم وخبرتهم السياحية. جودة الخدمة والتنظيم طبعا بيختلف من شركة للتانية وكذلك الاجر. عادة انت بتكون مش عارف مكسب الشركة كام, لكن ناس كتير بتحاول تحسبها علشان تكون عارفة الشركة واخدة منهم كام مكسب. انا بشوف بوستات اعلانات رحلات كتير وبقرأ الكومنتات الي عبارة عن مزاد من المبالغات في تخمين مكسب الشركة من كل فرد …. “دول كسبانييييين تلتتلاف جنيييية … لا لا دول واكلين خمستلاف جنييييبة”. بعض الشركات معقولة جدا في اسعارها وخدماتها والبعض الآخر بصراحة مبالغين اوي اوي اوي في مكاسبهم. يبقى انت عرضة لدفع عمولات مجحفة لبعض الشركات المبالغة في اسعار خدماتها. 

ثاني حاجة والاهم، بتطلع الرحلة وكل شئ بيمشي زي الفل لو الشركة كويسة وبتبقى الحمدلله رحلة جميلة وسعيدة. لكن بعد رجوعك من الرحلة دي، هل تقدر تعمل رحلة زيها لوحدك الى مكان آخر؟ انت لم تحجز او تتعلم اي شئ وكنت تحت رعاية واشراف الشركة المنظمة. طبعا الباشاوات الي بيحبوا النظام ده كتير. حقهم طبعا …. خلصانة بشياكة  😅

photostudio_1483408031620

فكرة جديدة

رحلة تدريب 

الطريقة الي عايز اعملها بقى هتكون مختلفة لحد كبير عن طريقة الباشاوات دي, هتكون على طريقة “لا تعطني سمكة ولكن علمني كيف اصطاد السمك والرز والسلاطات”. تدريب كامل وشامل عن كل حاجة متعلقة بالسفر والي هيتقسم الى مرحلتين:

المرحلة الاولى: مرحلة الاعداد

حضرتك الي هتعمل كد حاجة بنفسك من الالف الى الياء تحت اشرافي. يعني كل النظريات الي كتبتها عن حجوزات الطيران والفنادق هنضعها كلها في حيز التنفيذ في وجهة سفر محددة. هجتمع بجميع افراد الرحلة قبلها بوقت كافي (ممكن اونلاين او ممكن في مكان ما), كل واحد معاه الكمبيوتر بتاعه او التليفون بتاعه علشان يدور على تذكرة طيران مناسبة ويشتريها بنفسه، يدور على مكان اقامة مناسب لظروفه واحتياجاته، هنتعلم ازاي نعمل برنامج سفر كامل وازاي نستخدم الخرايط في تخطيط كل حاجة قبل السفر. ازاي نعمل ميزانية كاملة للرحلة كلها. ايه المواقع الي نستخدمها وازاي نستفيد منها قبل السفر. هيكون في واجب Homework لكل واحد يعمله ويقدمه لما نتقابل او نتكلم، علشان الاستفادة تكون حقيقية.

المرحلة الثانية: مرحلة التنفيذ

هنسافر مع بعض او هنتقابل في البلد الي هنسافرها. مش هنتحرك في مجموعات صغيرة من 4 او 5 افراد. هنتعلم ازاي نستخدم برامج الخرايط GPS ونركب المواصلات العامة علشان نروح اي مكان. ازاي نتعامل من غير لغة مع اهل البلد. ازاي نغير فلوس من الصرافات او نلاقي مطاعم كويسة او ندور على سهرات حلوة. هكون معاكم في كل خطوة علشان تغلطوا وتسألوني وتعرفوا ان الموضوع سهل ومافيهوش مشاكل. هنفذ البرامج السياحية الي عايزنها واتفقنا عليها, مع بعض او لوحدنا.

الهدف من الهري والمجهود ده كله ايه؟ انك تكسر خوفك من السفر بشكل عملي وتطبق كل النظريات الي بتقراها على النت وتحولها الى تجربة عملية، وتكون عارف ان في حد معاك هيلحقك في اي حاجة. اوعدك انك بعد الرحلة دي هتنطلق تسافر اي حتة لوحدك او مع صحابك لمدة اسبوع واتنين وتلاتة وبارخص الطرق. 

    تكلفة التدريب

علشان نقطع الشك باليقين, انت هتكون عارف من اليوم الأول ان تكلفة التدريب (لتغطية مصاريف السفر ومقابل التدريب) هتكون مبلغ محدد متفقين عليه من اليوم الأول. تبقى عارف راسك من رجلك وكل حاجة معلنة بكل شفافية. اول تصور في دماغي انها تكون في حدود ال50 دولارفي الرحلة. لكن الرقم ممكن يتغير شوية حسب العدد الي طالع والمكان الي رايحينه. 

   شروط الاشتراك

١- الرحلة هتكون للشباب من الجنسين – (ولاد وبنات) – بدون اطفال

معلش يا جماعة، طبيعة الرحلة هتكون شبابية ولن يتحملها الأطفال. ممكن تنظيم رحلات عائلية بعد كدة لو الفكرة نجحت.

٢- اسبقية القبول هتكون للمسافرين اول مرة.

علشان انا افضل ان الي يحضر التدريب ده يكون لسه لم يسبق له السفر قبل كدة ويقدر يستفيد منه اقصى استفادة. لكن طبعا اهلا بالجميع. الرحلات ممكن تكون متقسمة مجموعات على حسب خبرتهم. 

٣- الاشتراك في الرحلات هيكون مرة واحدة فقط.

انا عارف ان في ناس كتيرة هتستغرب الشرط ده. يعني انت مش عايز تكسب مننا تاني؟؟ عايزك تعتبر الرحلة دي زي كورس سواقة مثلا رايح تتعلمه. لو مطلعتش من الكورس بتعرف تسوق يبقى المدرب بتاعك فاشل. نفس الفكرة. المفروض انك من التطبيق العملي ده تكون فهمت كل حاجة وتقدر تنفذها في اي مكان تاني مع نفسك او صحابك. انا عايز يتم إتاحة الفرصة لاكتر عدد من الناس علشان الاستفادة تصل لناس كتير. يعني انا واحد عايز يعمل خدمة كويسة للزبون ومش عايز يشوفه تاني 🙂

٤- الالتزام والجدية في التدريب

يعني هيكون مطلوب حاجات تتعمل وتتحضر قبل السفر وهنكون متفقين على مواعيد وحاجات نعملها واحنا مسافرين. الالتزام بالحاجات دي هيكون مفيد ليك قبل اي حد تاني.

    هنروح فين طيب؟ 

اعتقد ان جورجيا هتكون مناسبة لتجربة الموضوع ده لعدة اسباب: التاشيرة سهلة اونلاين؛ تذكرة الطيران معقولة بالمقارنة بباقي اوروبا؛ البلد رخيصة وحلوة؛ واهم حاجة اني اكتشفتها كويس الى حد ما.لو رحلة جورجيا نجحت، ممكن كمان بالي في اندونيسيا في وقت اخر السنة دي.

تكلفة الرحلة هتكون كام؟ 

تذاكر الطيران ممكن تكون في حدود 230 الى 260 دولار. الاقامة والمصاريف والمواصلات والاكل والرحلات هتختلف من واحد للتاني طبعا، لكن لو مسافر اقتصادي وعايز توفر، هتكون في حدود ال 200 دولار في الاسبوع. بالاضافة الي تكلفة التدريب، هيكون كله “شاكب راكب” ٥٠٠ دولار كل حاجة (من غير شوبينج طبعا او ازايز شمبانيا في ديسكوهات هاهاهاهاها)

الميعاد المناسب

الميعاد المناسب ليا هيكون شهر مارس – بحيث نكون لحقنا قعدنا مع بعض واشترينا التذاكر واجتمعنا في القاهرة واسكندرية او اونلاين مرة او مرتين.  المواعيد المقترحة:

4 مارس الى 11 مارس او 

11 مارس الى 18 مارس 

ممكن اكتر من رحلة  …. الموضوع هيعتمد على مستوى الاقبال على الفكرة.

التنفيذ ازاي

الموافق على الفكرة والمواعيد يدخل على اللينك دي ويملى البيانات دي اويبعتهالي في رسالة, ويدفع 25 دولار او ما يساويها مقدم لجدية الاشتراك:

استمارة الاشتراك في رحلة التدريب على السفر الى جورجيا 

الاسم، السن، المدينة، رقم الموبايل، رقم Whatsapp، الايميل، الفيسبوك ايميل/تليفون، عدد مرات السفر قبل كدة: (كام بلد وفين، جواز السفر موجود: (نعم او لا)، المواعيد المناسبة للرحلة.

العدد المقترح

العدد المتاح في الرحلة هيكون من ١٥ الى ٢٠ فرد، على حسب خبرة السفر والمجموعات الي جاية مع بعضها. هجمع البيانات الي هتوصلني كلها وابلغكم في اقرب فرصة بالنتيجة علشان ندخل مرحلة التنفيذ مباشرة.

فريق عمل

قد يكون معايا خبراء سفر آخرين يساعدوني في المشروع ده ، لاني عايز الفكرة تكبر وتنجح وتكون مع الوقت بديل للشركات السياحية التقليدية ونقدر نعملها في بلاد كتير و مواعيد اكتر تناسب جميع الناس.

عرفوني في الكومنتات رأيكم في الفكرة بصراحة …. عايز اسمع آرائكم واقتراحاتكم …. المعترض قبل الموافق كمان.

14

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec