31
Aug-2016

٤ اسباب تمنعك من الذهاب الى اوروبا في شهر العسل

photostudio_1472187371449

“خلينا نتكلم كفنيين”  ….  ايه اللي انت بتبقى محتاجه في شهر العسل ؟! مكان جديد، جميل، رومانسي، هادي، تعرف تبقى مستريح فيه وواخد راحتك وتدلع نفسك … مكان هتقضي indoors   وقت اكتر من outdoors.

وكمان يا بطل هتكون مسافر مع مراتك، يعني كل مصاريف رحلتك مضروبة في اتنين, محتاج كمان مكان مصاريفه معقوله في الاكل والشرب والفسحة.

خلينا نعمل مقارنة بين اكتر وجهتين سفر ينفعونا شهر عسل …. اوروبا واسيا  ….. والمقارنة دي هتكون بين 4 حاجات اساسية

  • طبيعة المكان وطبيعة السفرية

انا معاكوا ان اوروبا من احلى البلاد الي في الارض … نضافة وشياكة وتاريخ وحضارة … ومدنها مليانة بالمعالم السياحية والمزارات ….بس يا جماعة المشكلة ان كل الكلام ده محتاج مجهود رهيب يوميا من المشي والجري بين المزارات والكنائس والمتاحف والميادين … يعني بالبلدي فرهدة حتى الثمالة. مش ممكن تكون في روما ولا باريس ولا برشلونة وما تنزلش تلف في شوارعها وتستمتع بحلاوتها.  طبيعة شهر العسل, على حد علمي المتواضع, بتحتاج توظيف طاقتك الجسدية بشكل افضل من كدة.

طبعا ممكن استثناء بعض الجزر والشواطئ الأوروبية من الامثلة دي زي سانتوريني او جزر الكناري.

honeymoon-destinations-thailand

جنوب شرق اسيا بقي يغلب عليها الجانب الاستجمامي الاسترخائي الشهر عسلي جدا. ونفس الوقت فيها بعض المزارات الي تتعمل, وكمان انشطة حلوة ورخيصة. عندك الاختيار ما بين الاسترخاء على الشواطئ وفي الغرفة او الفرهدة والخروج. حتى لو خرجتش كتير, مش هيفوتك كتير لان الجزر والشواطئ متشابهه …. والانشطة ممكن القيام بيها في اي بلد تانية.

ابقوا روحوا اوروبا بعد شهر العسل 😊

  • الاقامة الرومانسية

 الفنادق الاربع او خمس نجوم في اوروبا يا جماعة غالية جدا  …. وعلشان تلاقي حاجة معقولة في السعرهتكون الاوضة صغيرة جدا وفرشها بسيط والفيو بتاعها اي كلام. 100 دولار في باريس يجيبوا اوضة 12 متر.

بنفس سعر الفندق المعقول الي في اوروبا ممكن تسكن في فيلا كبيرة  بحمام سباحة خاص في منتجع ضخم وفخم جدا في جنوب شرق اسيا. حاجة اخر دلع وتناسب المرحلة دي من حياتك. بنفس ال100 دولار يا مؤمن ممكن تسكن في فيلا بحمام سباحة خاص ومساحته 600 متر!!!

Sweet Hotel, Paris, France - Booking.com 2016-08-11 19-11-45 Swara Hari Villa, Ubud, Indonesia - Booking.com 2016-08-11 19-09-13

photostudio_1472187371449

نصيحتي هي انك تاخدوا فندق من الغالين دول اول 4 ايام من رحلتكم مثلا, علشان تستمتعوا بالمكان وحلاوته, وبعد كدة انقلوا فندق ارخص وقضوا وقت اكتر في الانشطة والفسح. لو انا كابتن الفريق هتكون دي استراتيجية الماتش 😄.

  • تأشيرات مضمونة

طبعا كلنا عارفين اوروبا بتحتاج وقت ومجهود وحرقة دم واعصاب علشان استخراج التأشيرة. بتبقى ايدكم على قلبكم وموقفين كل خطوات تأكيد حجز الفندق والطيران لحد ما تتاكدوا من انكوا اخدتوا الفيزا. ولو حصل رفض, بتكونوا مضطرين تفكروا في خطة بديلة وساعتها هتكون الاسعار اعلى بكتير.

لكن التأشيرات لشرق آسيا اسهل بكتير من اوروبا. بل ان ماليزيا واندونيسيا مش بيتطلبوا استخراج تأشيرة للمصريين قبل السفر. بلاد كتيرة تأشيرتها موجودة اونلاين من غير مشوار للسفارة حتى.

  • المصاريف

البعض مننا بياخد اسعار تذاكر الطيران مؤشر عن تكلفة الرحلة. طبعا كلنا عارفين ان تذاكر الطيران لاوروبا ارخص من اسيا. لكن لما نقارن سعر تذكرة الطيران زائد مصاريف اصدار التأشيرة وفرق مصاريف المعيشة, هنلاقي ان اسيا هتكون ارخص في المجمل.

مصاريف اصدار الشنجن دلوقتي حوالي 900 جنية بينما تاشيرات شرق اسيا ببلاش او 300 جنية لتايلاند مثلا.

عندك مصاريف المعيشة اليومية في فرنسا واسبانيا (من غير الاقامة) من 60 الى 50 دولار للفرد, بينما في ماليزيا واندونيسيا مثلا هتلاقيها 15 الى 20 دولار في اليوم للفرد.

يعني مصاريف اكل شرب مواصلات في اوروبا لفردين لمدة 10 ايام هتكون اقل حاجة هتكون 1000 دولار, بينما في اسيا ممكن تكون 300 دولار. غير فروق الاسعار في الفسح, الانشطة, والهدايا والشوبينج.

ياريت تقروا كل حاجة عن ازاي تخططوا ميزانية الرحلة في بالتفصيل في المقالة دي. واتفرجوا هنا على باقي المقالات والفيديوهات في نصايح السفر الخاصة بالطيران والاقامة والتاشيرات.

ويارب تكون ايامكم كلها شهر عسل في اسيا او اوروبا او مصرنا المحروسة.

0

 likes / 4 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec