12
Jan-2017

الروشتة السحرية لسفر خالي من المشاكل الصحية

  • photostudio_1484221754522

اكتب اليكم هذه المقالة من فراش المرض والله … بعد ٤ شهور من السفر في اوروبا، شهرين منهم كانوا شتاء قارص ودرجات حرارة تحت الصفر بكتير، تمكن المرض مني واصبت بدور برد شديد. للأسف لم اكن مستعد باي ادوية وتأخرت كثيرا لحد ما روحت الصيدلية علشان اجيب دواء مناسب. علشان كدة خلوني اشاركم خبرتي في سنين السفر الي فاتت واقولكم اهم النصائح الطبية الي نعملها قبل السفر:

خد معاك الادوية العادية

لازم تاخد معاك ادوية للامراض العادية الي ممكن تيجي لاي حد في اي مكان واي وقت – (صداع برد – حرارة – مغص- اسهال – حموضة) – وخصوصا انها امراض ممكن تيجي في سفريات فيها تغيير جو او اكل جديد علينا او مكان مستويات التلوث فيه اعلى من بلادنا.  ليه بقى؟ علشان حضرتك لما تمرض وانت مسافر تلحق نفسك بالدواء على طول لانه مش بالساهل تلاقي ادوية مناسبة وانت مسافر …. فعلا؟؟؟

ممنوع بيع الدواء بدون روشتة

الكثير من البلد المحترمة لا تبيع الدواء بدون روشتة – يعني ممكن تكون مريض ومحتاج مضاء حيوي مثلا، ولكن مش هتعرف تشتريه علشان مش معاك روشتة من دكتور. يبقى الحل ساعتها انك تروح مستشفى تكشف وتاخد روشتة تجيب بيها الدواء. او تاخد بقى ادوية من الصيدلية لا تحتاج الى روشتة الي بتكون اعشاب بقى على حاجات خايبة كدة.

مش هتلاقي الدواء الي انت عارفه

افرض انك في بلد بتبيع الدواء لاي حد معدي من غير روشته، هل هتلاقي الدواء الي انت عارفه؟ للأسف ادوية كتيرة من الي احنا نعرفها في بلادنا بتكون غير اصلية واسمها التجاري مش موجود في بلاد تانية. فانت عقبال ما تشرح للدكتور في الصيدلية في تايلاند مثلا انت عندك ايه ويقدر يشخصك ويديك الدواء المناسب من وجهة نظره، ممكن جسمك ما يستريحش عليه علشان المادة الفعالة دي مثلا مش هي الي انت واخد عليها.

اسم المادة الفعالة

لو جسمك عنده حساسية من مادة فعالة معينة او لا يستجيب الا لدواء فيه مادة فعالة معينة، يبقى لما تطلب من الدكتور في الصيدلية دواء تطلبه باسم المادة الفعالة – مش بالاسم التجاري الي انت واخد عليه في بلدك. يعني في ناس لما تسخن تستريح على الادوية الي فيها paracetamol وناس تانية تستريح على الادوية الي فيهاibuprofen. اعرف الادوية الي بتريحك باسمها العلمي.

شرايط او وبرطمان

طبعا هتكون شيلة كبيرة تاخد معاك علبة دواء من كل مرض ممكن تعرض له وانت مسافر، علشان كده انصحك خد شريط من كل علبة وخلاص. الحل الي كانت عامله في اول رحلتي هو برطمان دواء قديم وتفرط فيه شريط بانادول على شريط بوسكوبان على شريط انتينال ….. تعمل برطمان كوكتيل لطيف كدة، بس المهم تكون عارف شكل الاقراص ايه.

لعنة التسلخات

كنت مرة في سنغافورة من ٨ سنين وكان وزني ازيد من دلوقتي اكتر من ٢٠ كج. اتمشيت يوم طويل جدا للتسوق والفرجة على البلد لحد ما اصبت بتسلخات حادة بسبب الرطوبة والجينز الضيق ….. قعدت ادور على صيدلية فاتحة زي المجنون، بس للأسف كانت ليلة ويك اند وكانوا بيقفلوا بدري. كملت يومي لحد ما ركبت طيارتي يوميها بالليل وانا ماشي فاتح رجليا من الالم ولامؤخذه زي المطّاهر هاهاهاهاهاها ….. واقسمت يوميها لاشتري كرتونة من مرهم التسلخات السحري “كيناكومب” واحط منه علبتين في كل شنط السفر الي في بيتي. حدث ذلك بالفعل واصبح في كل شنطة سفر كبيرة او صغيرة، وحتى شنطة اللابتوب، انبوبتين كيناكومب.

يبقى الاخوة الي وزنهم زايد شوية ومسافرين بلاد فيها تمشية كتير، اوصيكم بكريمات ومراهم التسلخات.

التطعيمات

بعض البلاد في افريقيا و آسيا تحتاج تطعيمات معينة قبل السفر في مراكز شركة المصل واللقاح الي في الدقي. مثلا قبل سفري الى السودان وكينيا وغانا والهند، كان لازم اخد بعض التطعيمات الي بيدوم مفعول بعضها سنة او اتنين او ٧ او ١٠ سنين. بيكون معاك شهادة صفراء اللون كدة مكتوب فيها التطعيمات الي اخدتها وتواريخها. تواصل مع هيئة المصل واللقاح علشان تعرف هل البلاد الي انت مسافرها تحتاج تطعيمات ولا لأ.

افريقيا والملاريا

حيث ان شغلي زمان كان فيه رحلات متعددة الى السودان وجنوب السودان، فكان من الحاجات الي بنقلق منها هناك هي الملاريا، لانها من اشهر الامراض في البلاد الافريقية والي ممكن تيجي من قرصة ناموسة. الملاريا مالهاش تطعيمات فعالة اوي لان انواعها كتير جدا. التطعيمات بتاعتها مش بتغطي جميع الانواع بتاعتها وليها اثار جانبية على المدى البعيد. علشان كده انا كنت باخد احتياطاتي الاساسية لمواجهة الناموس والملاريا الا وهي اللبس ذو الاكمام الطويلة ورشاش طارد الناموس Spray off.

لما كنت في رحلة سافاري في كينيا كنت واخد سبراي off معايا من مصر لكن مرشد الرحلة لما شافه قالي “لا لا … ما ينفعش هنا ده” … فهمت منه ان سبراي طارد الناموس ده المادة الفعالة بتاعته اسمها Deet ليها تركيزات مختلفة. الي في مصر عندنا ده تركيز ١٥٪ لكن الي يقدر يواجه الناموس في احراش افريقيا لازم يكون deet تركيز ٤٥-٥٠٪ …. لو مسافر بلاد افريقية، اول ما توصل البلد، اشتري spray طارد للناموس الي بيترش على جلد جسمك مباشرة ويكون تركيزه عالي علشان الوقاية.

غير كدة طبعا بيكون معايا شريط دواء علاج الملاريا علشان لو ظهرت عليا الاعراض (سهل معرفتها جدا) اخد جرعات الدواء على طول واخف في ٤٨-٧٢ ساعة. اشتري الدواء قبل ما تسافر او اول ما توصل البلد الي انت رايحها.

كان ليا صديق شغال في نيجيريا والسودان واصيب بالملاريا واتعالج منها ١٧ مرة. مش مشكلة خالص على فكرة طالما اخدت العلاج او روحت المستشفى على طول. لمعلومات اكتر عنها وعن اعراضها، اقرا المقالة دي على ويكيبيديا.

الروشتة

صديق صيدلي كتب لي الروشتة القادمة علشان تاخدوها معاكم. لو انتوا جروب، ممكن واحد بس يكون معاه الادوية وخلاص، مش لازم كل واحد يسافر معاه الادوية دي كلها. او تاخد الادوية للحاجات الي انت بتتعرض ليها في اغلب الوقت. استشر الطبيب الخاص بيك طبعا قبل اي حاجة:

أولاً : علاج البرد

– لو في سخونية يبقي تاخد
١- مضاد حيوي مثلاً اوجمنتين ١ جم
قرص مرتين يومياً
٢- مسكن و خافض للحرارة زي كتافلام قرص ٣ مرات بعد الاكل
٣- دوا للرشح و الزكام زي كومتريكس
قرص ٣ مرات يومياً

– لو مافيش سخونية
١- يبقي كومتريكس
٢- كتافلام

ثانياً : مشاكل المعدة

– مغص فقط بدون اسهال او امساك
١- ڤيسرالجين اقراص
قرص ٣ مرات يومياً

– إسهال مع مغص
١- اقراص ستربتوكين او انتوسيد
قرصين مع بعض ٣ مرات يومياً بس هوا يوم كفاية و هتلاقي الدنيا تمام

– إمساك مع مغص
١- اقرص ملينة زي سينالاكس و فيه بدايل تانية علشان مش دايماً بتلاقيها
٢- أو كل حاجات خضرا زي الخس و الخيار او كام كوباية نعناع

– الحموضة او آلام فوم المعدة ( اعلي المعدة تحت القفص الصدري )
١- زانتاك ٣٠٠ اقراص
قرص قبل الاكل عند اللزوم
و الناس اللي بتجيلهم حموضة كتير و عندهم اصلاً معدتهم تعبانة
يفضل نيكسيوم ٤٠ قرص واحد فقط في اليوم قبل الاكل هيظبطك اسبوع

– الانتفاخ
أقراص يوكاربون قرص ٣ مرات قبل الامل و ممكن تتظبط بعد القرص الاولاني علي طول

ثالثاً الصداع
الحل السحري كتافاست اكياس
كيس واحد و بعد عشر دقايق كله هيبقي تمام

رابعاً جروح سطحية
يبقي تاخد معاك مرهم مضاد حيوي زي الفيوسيدين تدهن منه ع الجرح مرتين يومياً علشان بس التلوث و عليه قطعة بلاستر

خامساً قطرة العين

الناس اللي بتحب حمامات السباحة وساعات بيجيلهم حساسية في عينيهم و تحمر اوي مع حرقان.
ياخد قطرة بريزولين نقطتين في كل عين ٤ مرات في اليوم و في نفس الوقت بتنفع برضه للانف في حالة انسدادها نقطتين في كل فتحة و هتلاقيها اتفتحت تماماً

سادساً الحساسية
١- قرص اريوس واحد يومياً قبل النوم

سابعاً التسلخات
كيناكومب كريم

طبعاً العلاجات ديه كلها يوم واحد هتظبطك ماعدا المضاد الحيوي في حالة ارتفاع الحرارة لازم تكمل الجرعة ع الاقل لمدة ٥ ايام
يحط

يبقي كده اقتراحي ان لازم يبقي معاك و اكيد كل واحد عارف بيجيله حالات ايه اكتر و ايه مبيجيلوش فممكن يستغني عن ادوية فيهم و ممكن كمان علشان العدد ممكن تاخد نصر شريط بس من كل حاجة لو السفر مثلاً اسبوع او اسبوعين بس :

١- شريط مضاد حيوي اوجمنتين
٢- شريط كتافلام ٥٠ مجم
٣- شريط كومتريكس
٤- شريط ڤيسرالچين
٥- شريط ستربتوكين او انتوسيد
٦- شريط يوكاربون
٧- شريط زانتاك ٣٠٠
٨- شريط اريوس
٩ -كريم فيوسيدين
١٠- كريم كيناكوم
١١- بريزولين قطرة

الهدف من المقالة هو ان احنا ناخد بالنا واحنا مسافرين علشان حاجات بسطة ممكن تنكد علينا السفرية كلها. انا مسافر 6 شهور من 2016 والحمدلله لم امرض,  يمكن مرضت في 2017 علشان اشاركم التصائح الغالية دي. الحمدلله على كل حال. اتمنى للجميع سفرا آمنا ان شاء الله بكامل صحتهم. 

3

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec